Rossiya mudofaa vaziri Sergey Shoygu “maxsus harbiy operatsiya olib borilayotgan zona”da “Vostok” qo‘shin guruhi shtabini ko‘zdan kechirdi. Bu haqda muassasa matbuot xizmati xabar berdi.
Press-relizga ko‘ra, qo‘mondonlik punktida Shoygu guruh qo‘mondoni general-leytenant Rustam Mudorov hamda birlashmalar va qo‘shilmalar qo‘mondonlari ma’ruzalarini tinglagan.
Mudofaa vazirligi xabar berishicha, Shoygu nazoratdan o‘tkazish chog‘ida “qo‘shinlarning har tomonlama ta’minlanishini tashkillashtirishga, harbiy-muhandislik ishlarini tashkillashtirishga va dala sharoitida shaxsiy tarkibni xavfsiz joylashtirish uchun sharoitlar yaratishga, shuningdek, tibbiy va frontorti bo‘linmalari faoliyatiga alohida e’tibor qaratgan”.
Bundan tashqari, vazir harbiy xizmatchilarga davlat mukofotlarini topshirgan.
Rossiya Mudofaa vazirligiga ko‘ra, Sergey Shoygu so‘nggi bir oy ichida jangovar harakatlar zonasiga ikki marta tashrif buyurgan. Birinchi marta bu haqda 2022-yil 18-dekabr kuni xabar berilgandi. O‘shanda, idora bayonotiga ko‘ra, vazir rossiyalik harbiylarning “old pozitsiyalari”ni ko‘zdan kechirgan, biroq faollar e’lon qilingan videoni tahlil qilib, Shoygu frontdan 80 kilometr uzoqlikda bo‘lgan, degan xulosaga kelgan.
Undan keyin Rossiya Mudofaa vazirligi Shoyguning “maxsus harbiy operatsiya zonasiga” tashrifi haqida 22-dekabrda ma’lum qilgan va vazir “shaxsiy tarkib va harbiy texnika joylashtirilgan sharoitlar bilan tanishgani” haqida yozgan.
Izoh (0)