Rossiya umidsizlikka tushgan — Pentagon

Rossiyaga qurol-yarog‘ yetishmayapti, shuning uchun u Eron va Shimoliy Koreyadan qurol so‘rashda davom etmoqda. Gap raketalar va uchuvchisiz uchar qurilmalar haqida bormoqda. Bu haqda AQSH davlat kotibi o‘rinbosari Vendi Sherman va mudofaa vazirining siyosiy masalalar bo‘yicha o‘rinbosari Kolin Kal ma’lum qildi, deb yozadi “Ukrinform”.

AQSHdagilar ishonch bildirishicha, bunday tendensiya saqlanib qoladi va Rossiya bundan keyin ham ushbu mamlakatlar bilan aloqalarni chuqurlashtirishda davom etadi.

“Rossiya o‘ziga yetishmayotgan qurol-yarog‘ga ega bo‘lish uchun boshqa davlatlar ko‘magiga tobora ko‘proq tayanaveradi”, — dedi Kolin Kal va bunday iltimoslarni umidsizlikka tushish belgisi deb atadi.

Shermanning so‘zlariga ko‘ra, AQSH Rossiyaning Eron bilan munosabatlaridan xavotirda, shuning uchun ham uning raketalar ishlab chiqarish bo‘yicha xatti-harakatlarini kuzatib borishda va sanksiyalar kiritishda davom etmoqda.

Eslatib o‘tamiz, Eron hukumati mart oyida Rossiyadan Su-35 qiruvchi samolyotlari, shuningdek, havo hujumidan mudofaa tizimlari, raketa komplekslari va vertolyotlar olishni rejalashtirmoqda.

Avvalroq Rossiya o‘z armiyasi tomonidan Ukrainada faol qo‘llanilayotgan Eron kamikadze-dronlarini o‘z hududida ishlab chiqarishni boshlamoqchi ekani xabar berilgandi.