Shavkat Mirziyoyev 16-yanvar kuni qish mavsumida aholini energiya resurslari bilan uzluksiz ta’minlash bo‘yicha ko‘rilayotgan choralar yuzasidan o‘tkazilgan kengaytirilgan yig‘ilishda Toshkentda ruxsatsiz qurilgan obyektlar soni oshib ketganini tanqid qildi.
Prezident matbuot kotibining xabar qilishicha, majlisda poytaxtning bosh rejasi haligacha tasdiqlanmagani qayd etilib, buning oqibatida ruxsatsiz qurilgan obyektlar soni 250 dan oshib ketgani tanqid qilindi.
Davlat rahbari, shuningdek, qurilishga ruxsat berilganda, mavjud infratuzilmaga yuklama bo‘yicha aniq hisob-kitob qilinmayotgani yuzasidan poytaxt mutasaddilariga qat’iy e’tiroz bildirdi.
Vazirlar Mahkamasining 2021-yil 19-noyabrdagi “2021−2024-yillarda Toshkent viloyatidan Toshkent shahriga ko‘chirilayotgan aholi punktlarini kompleks rivojlantirish va aholiga maishiy xizmat ko‘rsatish sohasini yanada takomillashtirish chora-tadbirlari to‘g‘risida”gi qarorida Toshkent hokimligiga Qurilish vazirligi bilan birgalikda 2023-yilgacha poytaxt bosh rejasini ishlab chiqish va tasdiqlash uchun kiritish vazifasi topshirilgandi.
Prezidentning 2018-yilning avgustidagi farmonidayoq Toshkentning tasdiqlangan bosh rejasi mavjud emasligi tartibsiz qurilishlarga olib kelayotgani, tadbirkorlik subyektlari faoliyatini yanada kengaytirishga imkon bermayotgani, shuningdek, poytaxtni faol ijtimoiy-iqtisodiy rivojlantirishga to‘sqinlik qilayotgani qayd etilgan edi.
Mavzuga doir: Jahongir Ortiqxo‘jayev ishdan olindi
Izoh (0)