“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 14-soni mavzusi “Ayolning gapi — gap” bo‘lib, dastur mehmoni sifatida jurnalist, “Anhor” internet nashri bosh muharriri Lola Islomova taklif etildi.
— Bizning zamonaviy jurnalistikani rivojlantirish markazimizda ko‘proq ayollar ishlaydi. Har bir loyihani gender jihatidan o‘rganamiz, treninglarga ham ayollarni ko‘proq jalb qilishga harakat qilamiz. Lekin aksariyat ayollarning oilasi ruxsat bermaydi yoki ishxonasidan javob ololmaydi. Ko‘p eshitaman, “Bu qizni o‘qitdim, kasbga o‘rgatdim, lekin turmushga chiqdi-yu ketdi, ishlamay uyda o‘tirib qoldi”, deyishadi. Bunday holatlar ham bor.
Aksar oilalarda jurnalist qizlarning tili uzun bo‘ladi, xo‘p deyishni bilmaydi, aqllilik qiladi, deb o‘ylab, ulardan uzoq bo‘lishga harakat qilishadi. Bir yili jurnalistika universitetining qabul komissiyasida o‘tirganimda vodiylik qiz keldi. “Otam ruxsat bermadilar, jurnalist bo‘lmaysan, dedilar. Men esa uch kun ovqat yemadim, ruxsat bermasangiz, umuman och o‘tiraman, deganimdan so‘ng sirtqi ta’limga hujjat topshirishim uchun ruxsat berdilar. Men yoki akang sen bilan birga borib, birga o‘qib, olib qaytamiz, dedilar”.Orzu va rejalarni amalga oshirish uchun ba’zan shunaqa qaysar ham bo‘lish kerak. Albatta, yaxshi maqsad bo‘lsa. Ruslarda shunday gap bor: “Senga to‘sqinlik qilayotgan narsaga tayanishing kerak”, — deydi Lola Islomova.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)