«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 14-сони мавзуси «Аёлнинг гапи — гап» бўлиб, дастур меҳмони сифатида журналист, «Анҳор» интернет нашри бош муҳаррири Лола Исломова таклиф этилди.
— Бизнинг замонавий журналистикани ривожлантириш марказимизда кўпроқ аёллар ишлайди. Ҳар бир лойиҳани гендер жиҳатидан ўрганамиз, тренингларга ҳам аёлларни кўпроқ жалб қилишга ҳаракат қиламиз. Лекин аксарият аёлларнинг оиласи рухсат бермайди ёки ишхонасидан жавоб ололмайди. Кўп эшитаман, «Бу қизни ўқитдим, касбга ўргатдим, лекин турмушга чиқди-ю кетди, ишламай уйда ўтириб қолди», дейишади. Бундай ҳолатлар ҳам бор.
Аксар оилаларда журналист қизларнинг тили узун бўлади, хўп дейишни билмайди, ақллилик қилади, деб ўйлаб, улардан узоқ бўлишга ҳаракат қилишади. Бир йили журналистика университетининг қабул комиссиясида ўтирганимда водийлик қиз келди. «Отам рухсат бермадилар, журналист бўлмайсан, дедилар. Мен эса уч кун овқат емадим, рухсат бермасангиз, умуман оч ўтираман, деганимдан сўнг сиртқи таълимга ҳужжат топширишим учун рухсат бердилар. Мен ёки аканг сен билан бирга бориб, бирга ўқиб, олиб қайтамиз, дедилар».Орзу ва режаларни амалга ошириш учун баъзан шунақа қайсар ҳам бўлиш керак. Албатта, яхши мақсад бўлса. Русларда шундай гап бор: «Сенга тўсқинлик қилаётган нарсага таянишинг керак», — дейди Лола Исломова.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)