Turkmaniston “yagona Xitoy” tamoyiliga qat’iy sodiq qoladi va “Tayvan mustaqilligi”ning har qanday shakllariga qarshi chiqadi. Bu haqda Xitoy xalq respublikasi va Turkmaniston yetakchilari Si Szinpin va Serdar Berdimuhamedovning Pekinda bo‘lib o‘tgan muzokaralar yakunlari bo‘yicha qo‘shma bayonotida aytiladi, deb yozadi TDH agentligi.
Turkmaniston Tayvan ko‘rfazi qirg‘oqlari o‘rtasidagi aloqalarning tinch yo‘l bilan rivojlanishini va Xitoy hukumatining mamlakatni birlashtirish bo‘yicha barcha sa’y-harakatlarini qo‘llab-quvvatlaydi, deyiladi bayonotda. Shuningdek, unda qayd etilishicha, tomonlar ichki ishlarga har qanday kuchlarning aralashuviga yo‘l qo‘ymaslik bo‘yicha yaqindan hamkorlik qiladi.
Xitoy tomoni, o‘z navbatida, Turkmanistonning mustaqil tanlangan rivojlanish yo‘lini hamda xalqaro huquqning umum tan olingan tamoyillariga muvofiq amalga oshirilayotgan ichki va tashqi siyosatini qat’iyan qo‘llab-quvvatlashini bildirdi.
Tomonlar transport infratuzilmasi, qishloq xo‘jaligi, gaz sohasidagi hamkorlik, armiyalararo aloqalar haqida ham kelishib oldi.
Turkmaniston prezidenti Serdar Berdimuhamedov Si Szinpinning taklifi bilan 2023-yil 5—6-yanvar kunlari Xitoyga tashrif buyurdi.
Serdar Berdimuhamedov va Si Szinpin bundan avval O‘zbekistonda 2022-yil sentabr oyida Shanxay hamkorlik tashkiloti (SHHT) sammiti doirasida uchrashgan edi. O‘shanda Xitoy rahbari “gaz sohasidagi hamkorlikning hajmi va ko‘lamini oshirishdan” manfaatdor ekanini bildirgan, shuningdek, qo‘shma logistika loyihalarini amalga oshirishni tezlashtirish zarurligini ta’kidlagan.
Noyabr oyida Turkmanistonga Xitoydan delegatsiya tashrif buyurgan. Muzokaralarning asosiy mavzusi Afg‘onistondagi vaziyat bo‘lgan.
Tayvan Xitoydan ajralib chiqqani haqida 1949-yilda, fuqarolar urushi davrida e’lon qilgan. Pekin orolning mustaqilligini tan olmaydi va uni o‘z provinsiyasi deb hisoblaydi.
Shu yilning aprel oyida bir guruh AQSH kongressmenlari tashrifidan keyin Xitoy va Tayvan atrofida vaziyat keskinlashdi. Avgust oyi boshida, Vakillar palatasi spikeri Nensi Pelosi Tayvanga tashrif buyurganida bu keskinlik o‘z cho‘qqisiga chiqdi. Uning tashrifi Xitoy tomonidan keskin tanqidga uchradi.
Izoh (0)