Toshkent viloyatida yashovchi shaxs farg‘onalik fuqaronining pullarini Telegram orqali o‘g‘irlagani aniqlandi. Bu haqda Kiberxavfsizlik markazi xabar qildi.
Qayd etilishicha, Rishton tumanida yashovchi fuqaro A.A. IIBga ariza bilan murojaat qilgan. U o‘z arizasida Telegram messenjerida “Agrobank bosh ofisi” nomli akkaunt foydalanuvchisi o‘zini bank xodimi deb tanishtirib, “Agrobank”dan yilllik 27 foiz hisobida 10 million so‘m miqdorida kredit chiqarib berishni aytganini bildirgan. O‘zini bank xodimi deb tanishtirgan shaxs A.A.ni aldab, 2 ta bank kartasi ma’lumotlarini olib, undagi jami 12 million 400 ming so‘m pullarni o‘zlashtirib, g‘oyib bo‘lgan.
Olib borilgan tezkor-qidiruv tadbirlari natijasida pullarni talon-toroj qilgan shaxs Toshkent viloyati Angren shahrida yashovchi K.D. (1997-yilda tug‘ilgan) ekani aniqlangan. Ma’lum bo‘lishicha, K.D. pullarni olib, onlayn qimor o‘yinlariga sarflab yuborgan.
Unga nisbatan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilib, tergov harakatlari olib borilgan.
Izoh (0)