Davlat statistika qo‘mitasi tomonidan “Statistika” integrallashgan axborot tizimi (SIAT) yaratildi hamda uning negizida siat.stat.uz O‘zbekiston Respublikasi statistika portali ishga tushirildi. Bu haqda qo‘mita axborot xizmati xabar qildi.
Qayd etilishicha, portal rasmiy statistika ma’lumotlar yagona bazasini shakllantiradi. Ma’lum bir davr bo‘yicha ma’lumotlarni elektron formatlarda olish imkoniyatini yaratadi.
SIATda rasmiy statistikani e’lon qilish va ularni foydalanuvchilar tomonidan qidirib topish vaqti 5-10 barobarga, alohida so‘rovlar asosidagi integratsiya qilish vaqti esa 10 kundan 1 kungacha qisqartirilgan.
“Bu, o‘z o‘rnida xalqaro tashkilotlar, jumladan, Open Data Watch tashkiloti ekspertlari tomonidan ijobiy baholandi”, — deyiladi xabarda.
Hozirgi kunda SIAT axborot tizimida 19 ta yo‘nalishda jami 1 700 dan ortiq rasmiy statistik ko‘rsatkichlar, 10 yillik dinamik qatorlarda, shuningdek, 30 yillik makroko‘rsatkichlar 5 yillik kesimda foydalanuvchilarga qulay va bepul shaklda yuklab olish uchun 3 xil (Excel, PDF va JPG) formatda hamda mustaqil ravishda integratsiya qilish uchun 3 xil (CSV, JSON va XML) formatda joylashtirilgan va doimiy ravishda yangilab boriladi.
Portalni ishlab chiqishda Yaponiya, Hindiston, Turkiya, Ozarbayjon, Rossiya, Belarus, Qozog‘iston va boshqa rivojlangan davlatlarning tajribasi o‘rganilgan.
O‘zbekiston Respublikasi statistika portalidan o‘zbek, rus va ingliz tillarida foydalanish mumkin.
SIAT axborot tizimi tegishli vazirlik va idoralar uchun zarur statistik ma’lumotlarni integratsiya yo‘li bilan elektron axborot almashinishni yo‘lga qo‘yish hamda quyidagi bir qator vazifalarni amalga oshirish maqsadida ishlab chiqilgan:
- ma’lumotlar bazasini boshqarishning zamonaviy tizimlarini joriy etish;
- raqamli statistik ma’lumotlar manbalarini yagona ma’lumotlar omboriga to‘plash;
- integratsiya platformasi (REST-API) asosida axborot almashinuvini yo‘lga qo‘yish;
- ma’lumotlarni vizual tasvirlash (jadval, grafik, diagramma, kartogramma) modulini joriy etish;
- statistik ma’lumotlardan foydalanuvchilar uchun yagona veb-interfeys joriy etish.
SDMX standarti asosida har bir statistik ko‘rsatkich bo‘yicha metama’lumotlarning tizimga joylashtirilganligi foydalanuvchilarga ko‘rsatkich birinchi bor e’lon qilingan, yangilangan sana, uning birlamchi manbasi, hisoblagan organ va uslubiyoti, mas’ul bo‘linma va xodim to‘g‘risida hamda shu kabi boshqa ma’lumotlarni olish imkonini beradi.
Izoh (0)