Жиззах вилоятининг Пахтакор туманида ноқонуний овчилар экология инспекторига тан жароҳати етказди. Бу ҳақда Жиззах вилояти экология ва атроф-муҳитни муҳофаза қилиш бошқармаси хабар берди.
Маълум қилинишича, 2 январь куни Жиззах вилояти Пахтакор тумани экология бўлими давлат инспекторларига тумандаги Акмал Икромов SIУ ҳудудида жойлашган фермер хўжалиги раҳбари томонидан ҳудудда ноқонуний ов қилиш ҳолатлари кузатилаётгани ва ушбу овчиларга нисбатан қонуний чора кўриш ҳақида мурожаат қилинган.
Мурожаатни ўрганиш мақсадида икки нафар туман экология инспекторлари ушбу фермер хўжалиги ҳудудига 2 январь куни тахминан 15:30 лар атрофида етиб борганда ҳудудда оқ рангли Nexia-1 да уч киши ов қуроллари билан ов қилиб юргани аниқланган.
Шундан сўнг инспекторлар овчилардан тегишли ҳужжатлар сўраганда, улар давлат инспекторларига қаршилик кўрсатиб, ҳужжатларни тақдим этмасдан машинани ҳайдаб кетишни бошлаган. Инспекторлардан бири машина орқа эшигини очиб, уларни тўхтатишга уринган. Лекин инспекторнинг қонуний талабига бўйсунмаган овчилар инспекторни машина салонига тортиб олиб, Зафаробод туманига томон ҳайдаб кетган.
Иккинчи инспектор Х.Сувонқулов автоулов орқасидан кузатиб боради ва машинага чиқиб олган инспектор Зафаробод тумани марказига тан жароҳати етказилган ҳолда автоуловдан тушириб қолдирилгани гувоҳи бўлади.
Мазкур ҳолат юзасидан ноқонуний овчиларнинг шахсини аниқлаш ва уларга нисбатан қонуний чора кўриш учун вилоят ИИБга хабар берилиб, жароҳатланган инспектор РШТТЁМ Жиззах вилояти филиалига тиббий ёрдам кўрсатиш учун олиб келинди.
Қайд этилишича, айни кунда ҳолат юзасидан вилоят ИИБ томонидан суриштирув ишлари олиб борилмоқда.
Изоҳ (0)