Chimyonda taqiqlangan hududda chang‘i uchgan Rossiya fuqarosi qor uyumlari ostida qolib, halok bo‘ldi. Bu haqda FVV matbuot xizmati xabar berdi.
Ma’lum qilinishicha, 4-yanvar kuni soat 13:20 larda Bo‘stonliq tumani Chimyon tog‘ yonbag‘irlariga dam olish va chang‘i uchish maqsadida chiqqan 61 yoshli Rossiya fuqarosi qor ko‘chkisi xavfi to‘g‘risidagi ogohlantirishlarga qaramay, taqiqlangan hududda chang‘i uchib, qor ko‘chkisi xavfini yuzaga keltirgan va qor uyumlari ostida qolib halok bo‘lgan.
Zudlik bilan hodisa joyiga Toshkent viloyati FVB Bo‘stonliq tumani ixtisoslashgan ko‘p tarmoqli boshqarmasi Chimyon qutqaruv otryadi qutqaruvchilari yetib borgan. Olib borilgan qidiruv ishlari davomida chang‘i uchuvchisining jasadi qor uyumlari ostidan chiqarib olingan.
Eslatib o‘tamiz, Bo‘stonliq tumani Chimyon tog‘liklarida 2—4-yanvar kunlari qor ko‘chki xavfi e’lon qilingandi. FVV Chimyonda dam olayotganlarni xavfsizlik qoidalariga qat’iy amal qilishga chaqirgandi.
Mavzuga doir: Bo‘stonliqdagi tog‘da soyga tushib ketgan fuqaro qutqarildi
Izoh (0)