Buxoro viloyatining Peshku tumani turli mahallalarida yashovchi ikki ayol o‘z joniga qasd qildi, deb xabar bermoqda “Xabar.uz”.
Ma’lum qilinishicha, ulardan biri hali turmushga chiqmagan 25 yoshli S.R. bo‘lib, 1-yanvar kuni tongda o‘zini osib, joniga qasd qilgan.
“Oilaning to‘ng‘ich farzandi, ya’ni S.R.ning akasi bir necha kun ilgari Jinoyat kodeksining 168-moddasi (firibgarlik) bilan ayblanib, uch yil qamoq muddatini o‘tab qaytgandi. Singlisining o‘limidan bir kungina ilgari uning oila a’zolari va akasi bilan suhbatlashib qaytgandik. Oila tinch, janjalkash emas. Achinarlisi, qizning o‘z joniga qasd qilishi uchun oilada biror sabab bo‘lmagan”,— degan qiz yashagan mahalla raisi.
MFY raisining aytishicha, 2022-yilning boshida tuman hokimi tomonidan S.R.ga o‘z faoliyatini yo‘lga qo‘yishi uchun tikuv mashinasi berilgan. Bundan tashqari, 3 sotxli yer maydonida issiqxona tashkil qilib berilgan, buning natijasida u qishloqning 10-15 nafar xotin-qizlarini ham ish bilan ta’minlagan. U nega o‘z joniga qasd qilgani noma’lum bo‘lib qolmoqda.
O‘z joniga qasd qilgan ikkinchi ayol D.M. 2019-yilda “Peshku” mahallasiga tumanning “Navbahor” mahallasidan kelin bo‘lib tushgan. Uch yoshli bir nafar o‘g‘il farzandi bor. Mahalla raisi yordamchisi Mayram Shodiyevaning so‘ziga ko‘ra, D.M. kelin bo‘lib tushgan xonadonda uch ovsin bir hovlida yashab keladi. Ahil va o‘ziga to‘q oilada o‘zaro kelishmovchilik bo‘lib turgandir, ammo mahallada hech qachon gap-so‘zlari chiqmagan.
Ma’lum bo‘lishicha, 2022-yilning 30-dekabrida D.M. turmush o‘rtog‘i bilan Peshku tuman markazidagi kiyim bozoriga borgan. Turmush o‘rtog‘ining bir necha marotaba ogohlantirishiga qaramay, D.M. bozorda ancha vaqt qolib ketgani sabab tanbeh eshitgan va o‘rtalarida tortishuv kelib chiqqan.
31-dekabr kuni D.M.ning qaynona-qaynotasi hamda uning turmush o‘rtog‘i bayram dasturxoni uchun mahsulotlar sotib olish maqsadida dehqon bozoriga ketgan. Hovlida D.M. farzandlar va uch ovsini bilan qolgan. Har uchala ovsin bayramga tayyorgarlik ishlari bilan band bo‘lgan.
Shu orada D.M. molxonaga chiqib ketgan va qaytib kelavermagan. Uning qolib ketganidan xavotirga tushgan ovsinlar D.M.ning ortidan molxonaga borgan va fojia ustidan chiqqan.
“D.M.ning eri bilan suhbat chog‘imizda, yosh kelin turmush o‘rtog‘ining Rossiyada ishlab yurgan kezlarida ham u bilan telefon orqali suhbati davomida bir necha marotaba yashagisi kelmayotgani, o‘zini o‘ldirishini bildirgan ekan. Qizining bunday gaplaridan D.M.ning onasining ham xabari bo‘lgan va bunday sovuq gaplarni aytmaslikka da’vat etib kelgan. Afsuski, qiz asabiy holatda aytayotgan bo‘lishi mumkin, deya o‘ylab, e’tibor qaratmay kelishgan. Bu ko‘pchilikda uchrashi mumkin bo‘lgan ruhiy holatdir balki...”, — degan mahalla raisi yordamchisi Mayram Shodiyeva.
Buxoro viloyati prokuraturasi mas’ul xodimining bildirishicha, har ikki holat yuzasidan ham Peshku tuman prokuraturasi tomonidan tergovga qadar tekshiruv ishlari olib borilmoqda.
Izoh (0)