30 milliondan 1 milliardgacha — Yangi yil archalari hokimliklarga qanchaga tushdi?

Yangi 2023-yil kirib kelishiga ham oz muddat qoldi. O‘zbekistonda esa bayram shukuhini o‘rnatilgan archa va uning bezaklaridan, ko‘chalardagi yorqin, yaltiroq chiroq va bezaklardan his qilish mumkin.

Yangi yil bayramining asosiy ramzi bo‘lgan bosh archalar O‘zbekistonning qaysi hududlarida o‘rnatilgan va byudjet pullari hisobiga olingan archalarga qancha sarflangan? Ushbu savol bilan viloyat va shahar hokimliklariga yuzlandik. Ammo ayrim hokimliklardan ajratilgan summani ochiqlashni istamadi.

“Daryo” nashri O‘zbekistonning barcha hududlari bo‘ylab o‘rnatilgan yangi yil bosh archasi haqida ma’lumotlarni jamladi.

Quyida yangi yil bosh archalari (viloyatlar kesimida):

Qoraqalpog‘iston Respublikasi

Nukus shahri Islom Karimov ko‘chasi, “Xalqlar do‘stligi” MFYda o‘rnatilgan. Qoraqalpog‘iston Respublikasi bosh archasining balandligi 22 metr. Archani o‘rnatish uchun esa 30 mln so‘m sarflangan.

Andijon viloyati

Viloyatning yangi yil bosh archasi Andijon shahrining Amir Temur shohko‘chasiga o‘rnatilgan, balandligi 63 metr. Andijon viloyati hokimlik matbuot xizmati sarflangan mablag‘ni ochiqlashni xohlamadi.

Buxoro viloyati

Viloyatning bosh archasi Buxoro shahar I.Mo‘minov ko‘chasi, Abu Ali ibn Sino nomidagi favvoralar maydonida o‘rnatilgan bo‘lib, balandligi 28 metrni tashkil qiladi. Shahar matbuot xizmati sarflangan mablag‘ni ochiqlashdan bosh tortdi.

Qashqadaryo viloyati

Bosh archa 31 metr bo‘lib, Qarshi shahridagi viloyat teatri yonida o‘rnatilgan. Viloyat hokimligi matbuot xizmati sarflangan mablag‘ni ochiqlashni istamadi.

Navoiy viloyati

Navoiy shahri Islom Karimov ko‘chasi Yoshlik xiyoboniga o‘rnatilgan markaziy archa balandligi 26 metrni tashkil qiladi. Navoiy shahar hokimligi matbuot xizmati ham sarflangan mablag‘ni ochiqlashni istamadi.

Namangan viloyati

Namangan shahridagi “Afsonalar vodiysi” bog‘ida o‘rnatilgan viloyat bosh archasining balandligi 43,4 metrni tashkil etadi. Archani o‘rnatish uchun esa “Namangan istiqlol bog‘i” MCHJ tomonidan 1 mlrd 486 mln so‘m sarflangan.

Surxondaryo viloyati

Termiz shahrida yangi yil bayrami munosabati bilan o‘rnatilgan bosh archa “Tuproqqo‘rg‘on” mahallasi Mustaqillik maydonida joylashgan. Balandligi yuqorisida o‘rnatilgan humo qushi bilan qo‘shib hisoblanganda 25 metrni tashkil etadi. Archa va uning bezaklari uchun 283 mln 940 so‘m ajratilgan.

Sirdaryo viloyati

Guliston shahrining Navoiy ko‘chasi, Guliston istirohat bog‘i oldida qad rostlagan archa balandligi 36 metr bo‘lib, uni o‘rnatish uchun 350 mln so‘m sarflangan.

Toshkent viloyati

Nurafshon shahridagi yangi amfiteatr hududida 30 metrlik archa o‘rnatilgan. Archani o‘rnatish uchun 350 mln so‘m pul sarflangan.

Farg‘ona viloyati

Farg‘ona shahri Islom Karimov nomidagi viloyat teatr va konsert saroyi ochiq sahniga balandligi 36 metr bo‘lgan yangi yil bosh archasi o‘rnatilgan. Farg‘ona viloyati hokimligi matbuot xizmati sarflangan mablag‘ni ochiqlashni xohlamadi.

Xorazm viloyati

Balandligi 33 metr bo‘lgan Xorazm viloyati bosh archasi Urganch shahar markazida o‘rnatilgan. Archani o‘rnatish uchun shahar hokimligi tomonidan 51 mln 500 ming so‘m ajratilgan.

Toshkent shahri

Poytaxtning bosh archasi Yunusobod tumani, Hyatt Regency Tashkent mehmonxonasi oldidagi maydonga o‘rnatilgan bo‘lib, balandligi 35 metrni tashkil qiladi. Bosh archani o‘rnatish tadbirlari uchun davlat budjetidan 1 mlrd 592 mln 858 ming so‘m sarflangan.

Jizzax shahri hokimligi matbuot xizmati hamda Samarqand viloyati hokimligi matbuot xizmati qayta aloqaga chiqishini aytib, keyingi qo‘ng‘iroqlarimizga javob bermadi.

Ma’lumotlar viloyat va shahar hokimliklari yordamida tayyorlandi.