30 миллиондан 1 миллиардгача — Янги йил арчалари ҳокимликларга қанчага тушди?

Янги 2023 йил кириб келишига ҳам оз муддат қолди. Ўзбекистонда эса байрам шукуҳини ўрнатилган арча ва унинг безакларидан, кўчалардаги ёрқин, ялтироқ чироқ ва безаклардан ҳис қилиш мумкин.

Янги йил байрамининг асосий рамзи бўлган бош арчалар Ўзбекистоннинг қайси ҳудудларида ўрнатилган ва бюджет пуллари ҳисобига олинган арчаларга қанча сарфланган? Ушбу савол билан вилоят ва шаҳар ҳокимликларига юзландик. Аммо айрим ҳокимликлардан ажратилган суммани очиқлашни истамади.

«Дарё» нашри Ўзбекистоннинг барча ҳудудлари бўйлаб ўрнатилган янги йил бош арчаси ҳақида маълумотларни жамлади.

Қуйида янги йил бош арчалари (вилоятлар кесимида):

Қорақалпоғистон Республикаси

Нукус шаҳри Ислом Каримов кўчаси, «Халқлар дўстлиги» МФЙда ўрнатилган. Қорақалпоғистон Республикаси бош арчасининг баландлиги 22 метр. Арчани ўрнатиш учун эса 30 млн сўм сарфланган.

Андижон вилояти

Вилоятнинг янги йил бош арчаси Андижон шаҳрининг Амир Темур шоҳкўчасига ўрнатилган, баландлиги 63 метр. Андижон вилояти ҳокимлик матбуот хизмати сарфланган маблағни очиқлашни хоҳламади.

Бухоро вилояти

Вилоятнинг бош арчаси Бухоро шаҳар I.Мўминов кўчаси, Абу Али ибн Сино номидаги фавворалар майдонида ўрнатилган бўлиб, баландлиги 28 метрни ташкил қилади. Шаҳар матбуот хизмати сарфланган маблағни очиқлашдан бош тортди.

Қашқадарё вилояти

Бош арча 31 метр бўлиб, Қарши шаҳридаги вилоят театри ёнида ўрнатилган. Вилоят ҳокимлиги матбуот хизмати сарфланган маблағни очиқлашни истамади.

Навоий вилояти

Навоий шаҳри Ислом Каримов кўчаси Ёшлик хиёбонига ўрнатилган марказий арча баландлиги 26 метрни ташкил қилади. Навоий шаҳар ҳокимлиги матбуот хизмати ҳам сарфланган маблағни очиқлашни истамади.

Наманган вилояти

Наманган шаҳридаги «Афсоналар водийси» боғида ўрнатилган вилоят бош арчасининг баландлиги 43,4 метрни ташкил этади. Арчани ўрнатиш учун эса «Наманган истиқлол боғи» МЧЖ томонидан 1 млрд 486 млн сўм сарфланган.

Сурхондарё вилояти

Термиз шаҳрида янги йил байрами муносабати билан ўрнатилган бош арча «Тупроққўрғон» маҳалласи Мустақиллик майдонида жойлашган. Баландлиги юқорисида ўрнатилган ҳумо қуши билан қўшиб ҳисобланганда 25 метрни ташкил этади. Арча ва унинг безаклари учун 283 млн 940 сўм ажратилган.

Сирдарё вилояти

Гулистон шаҳрининг Навоий кўчаси, Гулистон истироҳат боғи олдида қад ростлаган арча баландлиги 36 метр бўлиб, уни ўрнатиш учун 350 млн сўм сарфланган.

Тошкент вилояти

Нурафшон шаҳридаги янги амфитеатр ҳудудида 30 метрлик арча ўрнатилган. Арчани ўрнатиш учун 350 млн сўм пул сарфланган.

Фарғона вилояти

Фарғона шаҳри Ислом Каримов номидаги вилоят театр ва концерт саройи очиқ саҳнига баландлиги 36 метр бўлган янги йил бош арчаси ўрнатилган. Фарғона вилояти ҳокимлиги матбуот хизмати сарфланган маблағни очиқлашни хоҳламади.

Хоразм вилояти

Баландлиги 33 метр бўлган Хоразм вилояти бош арчаси Урганч шаҳар марказида ўрнатилган. Арчани ўрнатиш учун шаҳар ҳокимлиги томонидан 51 млн 500 минг сўм ажратилган.

Тошкент шаҳри

Пойтахтнинг бош арчаси Юнусобод тумани, Hyatt Regency Tashkent меҳмонхонаси олдидаги майдонга ўрнатилган бўлиб, баландлиги 35 метрни ташкил қилади. Бош арчани ўрнатиш тадбирлари учун давлат бюджетидан 1 млрд 592 млн 858 минг сўм сарфланган.

Жиззах шаҳри ҳокимлиги матбуот хизмати ҳамда Самарқанд вилояти ҳокимлиги матбуот хизмати қайта алоқага чиқишини айтиб, кейинги қўнғироқларимизга жавоб бермади.

Маълумотлар вилоят ва шаҳар ҳокимликлари ёрдамида тайёрланди.