“Imkoniyatimiz bo‘lishi bilan yana ko‘paytiramiz” — prezident pedagoglarning maoshlari haqida

Ayni vaqtda prezident Shavkat Mirziyoyev Xalqaro kongress markazida ta’lim sohasidagi islohotlar haqida murojaat qilmoqda.

Davlat rahbari bugun yoshlarning o‘zi “Bizga kechagi kun ta’limi kerak emas” degan talabni qo‘yishayotganini aytdi. 

“Yilimiz nomini ham ta’limga bog‘laganimiz bejiz emas. Bu masala mening doimiy diqqat markazimda bo‘ladi. Maoshlaringizni oshirdik, lekin bu bilan to‘xtab qolmaymiz. Imkoniyatimiz bo‘lishi bilan yana ko‘paytiramiz” – dedi prezident.

Davlat rahbari xotin-qizlar ta’limi haqida gapirar ekan, qiz bolani o‘qitish – jamiyatni o‘qitish ekanligini aytdi.

“Nega men har yili xotin-qizlar uchun kvotalar tashkil qilishni aytaman? Bolalarni kim tarbiya qiladi? Albatta, ayollar. Shuning uchun biz qizlarimizni, onalarimizni o‘qitishimiz kerak. Shunda jamiyatni o‘qitgan bo‘lamiz.

Kelgusi yili ta’limga oid ham ko‘plab qaror, farmonlar chiqadi. Shuningdek, maktab o‘qituvchilari uchun ipoteka kreditlarini kamaytirsak bu ham yaxshi bo‘ladi. Bugun men ko‘p savollarga javob oldim. Albatta, 20-30-40 yil davomida eskicha dars bergan o‘qituvchiga yangi darsliklarga o‘tish biroz og‘ir. Lekin bugun bu narsani qilmasak, ertaga o‘zimiz kutgan natijani ololmaymiz”, — dedi prezident.