“Veolia Energy Tashkent” MCHJ Toshkentdagi ko‘p kvartirali uylarda resirkulyatsiya (aylanma) nasoslarni o‘rnatishga kirishdi. Nasoslar muammoli joylarda o‘rnatiladi va isitish va issiq suv uzatilishini yaxshilaydi.
Qayd etilishicha, kompaniya mavjud 230 ta nasos o‘rnatilganidan so‘ng navbatdagi uskunalar partiyasini xarid qilishni rejalashtirmoqda. Noyabr oyida “Veolia Energy Tashkent” MCHJ XK Yangihayot tumani Do‘stlik-1 massivida markazlashtirilgan issiqlik ta’minoti tizimini yaxshilash bo‘yicha pilot loyihani amalga oshirdi. Kompaniya mutaxassislari yettita ko‘p qavatli uyda resirkulyatsiya (aylanma) nasoslar o‘rnatdi. Ushbu qaror bosimni oshirish va issiq suv aylanishini optimallashtirish va natijada turar joy binolarida isitishni yaxshilash imkonini berdi.
Nasoslar issiqlik ta’minotining umumiy balansini saqlashda o‘z samaradorligini ko‘rsatdi. “Veolia Energy Tashkent” 230 ta ixcham resirkulyatsiya nasosni sotib olgan va ular tez orada muammoli joylarga o‘rnatiladi.
Muammoli lokatsiyalar “Termis Engineering” dasturiy ta’minot yordamida tanlab olindi. Ushbu ilg‘or ko‘p funksiyali platforma dunyoning 500 dan ortiq shaharlarida issiqlik ta’minoti korxonalari tomonidan qo‘llaniladi.
Toshkent issiqlik tarmoqlarini raqamlashtirishdan so‘ng “Termis Engineering” dasturi qo‘shimcha uskunalar o‘rnatish zarur bo‘lgan shaharning eng zaif hududlarini aniqladi. Hozir Chilonzor tumanidagi uchta 12 qavatli uyda resirkulyatsion nasoslar o‘rnatilmoqda. Shuningdek, Yashnobod tumanidagi 4 ta ko‘p qavatli uyda ham shunday nasoslar o‘rnatilgan.
“Veolia Energy Tashkent” 2023-yilda uskunalarni sotib olish va o‘rnatishda davom etadi. Ushbu yordamchi uskunalarning o‘rnatilishi amaldagi tariflarga ta’sir qilmaydi.
Izoh (0)