Qoramollarda brutsellyoz va oqsil kasalligi tarqalgani yuzasidan rasmiy ma’lumot berildi

Ijtimoiy tarmoqlarda Andijon viloyatida fermerlik qiluvchi fuqaro chet eldan olib kelingan zotli qoramollarga qilingan vaksinalar foyda bermayotgani, natijada hayvonlar yashur (oqsil) kasalligiga chalinib, nobud bo‘layotganini aytgan. Shuningdek, u kasal mollar go‘shti va suti odamlarga sotilayotganini qo‘shimcha qilgan.

“Daryo” muxbiri holat yuzasidan Respublika hayvonlar kasalliklari tashxisi va oziq-ovqat mahsulotlari xavfsizligi davlat markazidan izoh oldi. Markazning laboratoriya bo‘limi mudiri Abdurauf Yusufahmedovning ma’lum qilishicha, Andijon viloyatidagi dehqon bozorlaridan go‘sht va sut namunalari olib kelib, tekshirilgan.

Andijon viloyatining Andijon, Asaka, Bo‘ston, Baliqchi, Buloqboshi, Jalaquduq, Marhamat, Izboskan, Xo‘jaobod, Paxtaobod, Qo‘rg‘ontepa, Shahrixon tumanlaridagi dehqon bozorlari hududida joylashgan go‘sht do‘konlaridan 154 ta go‘sht namunasi hamda “Qo‘rg‘ontepa” MFY hududidagi “Savay Milk groop” fermer xo‘jaligi qoramollaridan 110 ta qon va 32 ta sut namunasi laboratoriya tahlillari uchun keltirildi.

Markazning IFA va PZR laboratoriyasida keltirilgan 154 ta go‘sht namunalari yashur (oqsil) kasalligining qo‘zg‘atuvchisini va salmonellyoz qo‘zg‘atuvchisini aniqlash bo‘yicha zamonaviy polimeraz zanjir reaksiyasi PZR usulida tekshirildi. Laboratoriya tahlillari natijasiga ko‘ra 154 ta go‘sht namunalarida yashur (oqsil) va salmonellyoz qo‘zg‘atuvchisi aniqlanmadi.

Brutsellyoz va yashur (oqsil) kasalligi “O” serotipi qo‘zg‘atuvchilariga hosil bo‘lgan antitanachalarni immunoferment analizi IFA usulida tekshirilganda, 110 bosh qoramol qon zardobi namunalarida immunitet mavjudligi aniqlandi va immun faollik darajasi 83 foizni tashkil qildi.

Qo‘shimcha qilinishicha, markazning toksikologiya, veterinariya sanitariya ekspertizasi, oziq-ovqat mahsulotlarining xavfsizligi, radiologiya laboratoriyalarida 154 ta go‘sht namunalarining sifati va xavfsizligi bo‘yicha antibiotik qoldiqlari, pestitsidlar, og‘ir metallar, fizik-kimyoviy va radiologik ko‘rsatkichlar bo‘yicha tahlillar o‘tkazilgan. Laboratoriya tahlillari natijasiga ko‘ra, 154 ta go‘sht namunalarida antibiotik qoldiqlari, pestitsidlar, og‘ir metallar, fizik-kimyoviy va radiologik ko‘rsatkichlar belgilangan me’yoridan yuqori emasligi aniqlangan.

“Qo‘rg‘ontepa” MFY hududidagi “Savay Milk groop” fermer xo‘jaligi qoramollaridan 32 ta sut namunasi brutsellyoz kasalligiga sut halqa reaksiyasi usulida laboratoriya tahlili o‘tkazilganda brutsellyoz kasalligi aniqlanmagan.