Bosh prokuratura huzuridagi departamentning ma’muriy binosini ta’mirlashda qatnashgan tadbirkor salkam 600 million so‘m miqdoridagi ish haqini ololmayotgani haqida xabar berilgandi. Mazkur voqeaga munosabat bildirgan departament mas’ullari buyurtmaga ko‘ra, ish bajaruvchilarga 8 milliard 600 million so‘m miqdoridagi mablag‘ to‘lab berilganini bildirgandi.
Tan olish kerak, o‘sha tanqidiy chiqishdan so‘ng harakat boshlangandi. Ammo bu safar ham aldashdi. Tadbirkor qamoqdan chiqib keldi. Men bilan uchrashib, bir oy ichida barcha pullarni berishini aytdi. So‘ngra aytilgan muddatda pulni berolmagach, yana muddat so‘radi. Bugungi kunga kelib esa, Yangi yil bayramigacha harakat qilib, imkoniyatim yetganicha qilib beraman degan gapni aytyapti, — deydi pulini ololmayotganini aytgan tadbirkor Jasur Namozov.
Tadbirkor poytaxtda, rahbarlar ko‘z o‘ngida shunday adolatsizlik bo‘lsa-da, mas’ullar bunga e’tibor qaratmayotganini aytmoqda.
Fuqaro sifatida muammolarni aytyapmiz. Rahbarlar bu muammolarni eshitib tursa-da, ko‘rayotgan bo‘lsa-da, jim turibdi. Yordam berish, hal etish degan masala bo‘lmayapti, — deydi murojaatchi.
Jasur Namozov eng avvalo Bosh prokuratura huzuridagi departamentning Dilshod ismli rahbariga ishonganini, uning topshirig‘iga ko‘ra ta’mirlash ishlarini olib borganini, ammo bugungi kunga kelib, pulini ololmay sarson bo‘layotganini aytmoqda.
Eng avvalo, departament boshlig‘i Dilshod akaga ishongandim. Dastlab firma orqali shartnoma qilaylik deganimda Dilshod aka “Qayerda ishlayotganingni bilyapsanmi? O‘zim barcha pullaringni olib beraman”, degandi. Men aynan shu insonga ishongandim, — deydi muammo bilan yuzlashayotgan tadbirkor.
Pulini ololmayotgan ishchilarni ishga jalb qilgan quruvchi Jasur Namozovning “Daryo” jurnalisti bilan dastlabki suhbatida u departament binosi ta’mirini boshlashdan avval Bosh prokuratura huzuridagi Iqtisodiy jinoyatlarga qarshi kurashish departamenti boshlig‘i Dilshod Rahimov bilan shaxsan ko‘rishganini bildirgandi.
Ishni boshlashdan avval Rustam aka bilan gaplashib, departament boshlig‘i Dilshod akaning oldiga kirganmiz. Dilshod akaning o‘zi bu departament binosi ekanini, shu sabab boshqalarga nisbatan arzonroq qilib, ta’mirlab berishimizni so‘radi. Boshqa ustalar kv/metrini 18 dollardan qilayotgan bo‘lsa, men Dilshod akaning iltimosiga ko‘ra 16,5 dollarga tushirdim. Qolaversa, Dilshod aka agar firma orqali pul to‘lansa, soliqlari bilan ko‘payib ketishini aytib, naqd pul berishini bildirdi. Shu kelishuvga ko‘ra, men bu binoda 800 million so‘mlik ishni bajardim. Salkam 40 kishini olib kelib ishlatdim. Endi esa 600 million so‘mga yaqin pulimizni ololmay sarsonmiz. Mening nafaqat ishchilardan, qurilish materiallari sotuvchi tanishlarimdan ham qarzim bor. Ammo endilikda Dilshod akaning oldiga olib kirishmayapti. Ataylab uchrashtirishmayapti, — degandi u.
Mazkur muammo jamoatchilikka ochiqlaganidan so‘ng departament axborot xizmati “Daryo” internet nashriga bino ta’miri uchun Toshkent shahar hokimligi huzuridagi Yagona buyurtmachi injiniring kompaniyasiga so‘ralgan pul — 8 milliard 600 million so‘mlik pul to‘lab berilganini bildirgandi. Hokimlik qoshidagi injiniring kompaniya rahbariyati ham departamentdan olingan pullar “Saddiniso Habibullo” xususiy korxonasi hisob raqamiga o‘tkazib berilganini aytdi.
Mazkur muammo ko‘tarilgach, hal etilar degan umidda hamon kutyapmiz. Ammo Yangi yil yaqinlashdiki, natija bo‘lmayapti. “Saddiniso Habibullo” xususiy korxonasi rahbari qamoqdan ham chiqdi. Ikki-uch marta va’da berib, pulni qaytarish uchun muddat so‘radi. Ammo aytilgan muddatda ham va’dasini bajarmayapti. Biz bu holat yuzasidan mas’ullardan natija kutyapmiz. Yangi O‘zbekistonda inson huquqlari kafolatlanishi, har kim mehnati uchun adolatli haq olishi ta’minlanishidan umidvormiz, — deydi tadbirkor.
Izoh (0)