Ижтимоий тармоқларда Андижон вилоятида фермерлик қилувчи фуқаро чет элдан олиб келинган зотли қорамолларга қилинган вакциналар фойда бермаётгани, натижада ҳайвонлар яшур (оқсил) касаллигига чалиниб, нобуд бўлаётганини айтган. Шунингдек, у касал моллар гўшти ва сути одамларга сотилаётганини қўшимча қилган.
«Дарё» мухбири ҳолат юзасидан Республика ҳайвонлар касалликлари ташхиси ва озиқ-овқат маҳсулотлари хавфсизлиги давлат марказидан изоҳ олди. Марказнинг лаборатория бўлими мудири Абдурауф Юсуфаҳмедовнинг маълум қилишича, Андижон вилоятидаги деҳқон бозорларидан гўшт ва сут намуналари олиб келиб, текширилган.
Андижон вилоятининг Андижон, Асака, Бўстон, Балиқчи, Булоқбоши, Жалақудуқ, Марҳамат, Избоскан, Хўжаобод, Пахтаобод, Қўрғонтепа, Шаҳрихон туманларидаги деҳқон бозорлари ҳудудида жойлашган гўшт дўконларидан 154 та гўшт намунаси ҳамда «Қўрғонтепа» МФЙ ҳудудидаги «Savay Milk groop» фермер хўжалиги қорамолларидан 110 та қон ва 32 та сут намунаси лаборатория таҳлиллари учун келтирилди.Қўшимча қилинишича, марказнинг токсикология, ветеринария санитария экспертизаси, озиқ-овқат маҳсулотларининг хавфсизлиги, радиология лабораторияларида 154 та гўшт намуналарининг сифати ва хавфсизлиги бўйича антибиотик қолдиқлари, пестицидлар, оғир металлар, физик-кимёвий ва радиологик кўрсаткичлар бўйича таҳлиллар ўтказилган. Лаборатория таҳлиллари натижасига кўра, 154 та гўшт намуналарида антибиотик қолдиқлари, пестицидлар, оғир металлар, физик-кимёвий ва радиологик кўрсаткичлар белгиланган меъёридан юқори эмаслиги аниқланган.Марказнинг ИФА ва ПЗР лабораториясида келтирилган 154 та гўшт намуналари яшур (оқсил) касаллигининг қўзғатувчисини ва салмонеллёз қўзғатувчисини аниқлаш бўйича замонавий полимераз занжир реакцияси ПЗР усулида текширилди. Лаборатория таҳлиллари натижасига кўра 154 та гўшт намуналарида яшур (оқсил) ва салмонеллёз қўзғатувчиси аниқланмади.
Бруцеллёз ва яшур (оқсил) касаллиги «О» серотипи қўзғатувчиларига ҳосил бўлган антитаначаларни иммунофермент анализи ИФА усулида текширилганда, 110 бош қорамол қон зардоби намуналарида иммунитет мавжудлиги аниқланди ва иммун фаоллик даражаси 83 фоизни ташкил қилди.
«Қўрғонтепа» МФЙ ҳудудидаги «Savay Milk groop» фермер хўжалиги қорамолларидан 32 та сут намунаси бруцеллёз касаллигига сут ҳалқа реакцияси усулида лаборатория таҳлили ўтказилганда бруцеллёз касаллиги аниқланмаган.
Изоҳ (0)