Ўзбекистон мусулмонлари идораси фуқароларни пиротехника воситаларидан фойдаланиш ва унинг савдоси билан шуғулланишдан қайтарди.
Идора матбуот хизмати ҳар йили милодий сана бошланиш арафасида айрим кишилар томонидан пиротехника воситалари — пақилдоқларни ёқиш оқибатида жуда кўп одамлар ороми бузилиб, хотиржамлик йўқолиши, турли кўнгилсиз воқеалар, таъбни хира қиладиган ҳолатлар содир бўлишини қайд этган.
Қўққисдан пиротехника портлаганини эшитган кексалар ёки бемор кишиларнинг аҳволи анча оғирлашгани, айрим ҳолларда эса ўлим билан тугагани кўпчиликка маълумлиги, шифокорлар унинг овози тўсатдан чўчитгани боис юрак-қон томир тизимига салбий таъсир этиши ҳақида огоҳлантиргани ҳам таъкидланган.
«Ҳадисларда ҳазрати пайғамбаримиз с.а.в. мусулмонни қўрқитиш — мусулмонга ҳалол эмас, деб таъкидлаганлар. Бошқа ҳадиси шарифда эса Набий алайҳиссалом мусулмон мусулмонлар унинг тилидан ва қўлидан саломат бўлган кишидир, дея марҳамат қилганлар», — дея билдириб ўтган Мусулмонлар идораси.
Пиротехника воситалари олди-сотдисидан тушаётган пул ҳам ҳалол эмаслиги, бундай буюмларни сотиб олиш молни исроф қилиш эканлиги таъкидлаб ўтилган: «Пиротехника воситалари савдоси билан шуғулланувчилар бунинг оқибатида содир бўладиган гуноҳга ҳам шерикдир. Унинг олди-сотдисидан тушаётган пул ҳам ҳалол эмас».
Ўзбекистон қонунчилигида ҳам пиротехника воситалари ноқонуний олди-сотдиси учун жавобгарлик белгиланган.
Маъмурий жавобгарлик тўғрисидаги кодекснинг 185-1-моддасига мувофиқ, пиротехника буюмларини қонунга хилоф равишда ишлаб чиқариш, тайёрлаш, сақлаш, ташиш, жўнатиш, улардан фойдаланиаш, худди шунингдек, уларни Ўзбекистонга олиб кириш ёки Ўзбекистондан олиб чиқиш ёки ўтказиш ҳуқуқбузарлик ашёларини мусодара қилиб, БҲМнинг 5 бараваридан 25 бараваригача миқдорда жарима солишга сабаб бўлади.
Жиноят кодексининг 250-1-моддасида эса бундай қилмишлар содир этганлар учун ким томонидан содир этилгани ва қандай оқибатларга олиб келганига қараб турли жазо чоралари, жумладан, 8 йилдан 10 йилгача озодликдан маҳрум қилиш жазоси қўлланиши кўзда тутилган.
Мавзуга доир:
Изоҳ (0)