Shavkat Mirziyoyev 19-dekabr kuni “Elektromobillardan foydalanish infratuzilmasini kengaytirish chora-tadbirlari to‘g‘risida”gi qarorni imzoladi. Unda belgilanishicha, 2024-yil oxiriga qadar O‘zbekistonda quvvatlantirish stansiyalarining soni 2 500 taga yetkaziladi (hozir 70 ta).
Bunda:
- 2023-yilda elektr tarmoqlari, transformator va nimstansiyalarga tutash hududlarda 1 400 taquvvatlantirish stansiyasi o‘rnatish uchun yerlar auksionga chiqariladi;
- “Hududiy elektr tarmoqlari” tomonidan xalqaro va davlat ahamiyatidagi avtomobil yo‘llariga tutash hududlarda kamida 500 ta quvvatlantirish stansiyasi quriladi;
- 2023—2024-yillarda kamida 500 ta quvvatlantirish stansiyalarini joylashtirish uchun davlat tashkilotlarining bo‘sh hududlari “K-savdo” orqali auksionga chiqariladi.
Bundan tashqari, 2023-yil 1-yanvardan 2026-yil 1-yanvarga qadar quvvatlantirish stansiyalari va ular o‘rnatilgan avtomobil to‘xtash joylari joylashgan yer uchastkalari yer solig‘idan, quvvatlantirish stansiyalari mol-mulk solig‘idan, asosiy faoliyat turi transport vositalarini quvvatlantirish xizmatini ko‘rsatish bo‘lgan tadbirkorlar esa foyda solig‘idan hamda transport vositalarini quvvatlantirish xizmatini ko‘rsatishda aylanmadan olinadigan daromad solig‘idan ozod etiladi.
Shuningdek, import qilinadigan quvvatlantirish stansiyalari, ularning komponentlari va servis infratuzilmasi uchun texnologik asbob-uskunalar bojxona bojidan ozod etiladi.
Avvalroq 2030-yil 1-yanvarga qadar O‘zbekistonda ishlab chiqarilgan elektromobillar va gibrid avtomobillar bojxona boji va utilizatsiya yig‘imidan ozod qilinishi belgilangan edi.
Izoh (0)