Fernandu Santush: “Terma jamoada ishlar ekansan qiyin qarorlar chiqarishga majbursan va undan norozilar doim bo‘ladi”

Portugaliya terma jamoasi sobiq bosh murabbiyi Fernandu Santush iste’fodan keyingi fikrlari bilan o‘rtoqlashdi.

“Jamoani ulkan minnatdorchilik kayfiyatida tark etaman. Terma jamoa murabbiyi bo‘lish, vatan sha’nini himoya qilish — ulkan sharaf. Bu men amalga oshirgan orzu, erishgan maqsad bo‘ldi.

Men bilan 2014-yildan shu vaqtga qadar ishlagan barcha futbolchilarga rahmat aytaman. Jamoani boshqarar ekansan, qiyin tanlovlar qilishingga to‘g‘ri keladi va albatta, qarordan norozilar doim bo‘ladi. Biroq doim qarorlarni terma jamoa foydasini ko‘zlab chiqarganman.

Shuningdek, hamkasblar, federatsiya, birga ishlagan barchaga tashakkur aytaman. Va albatta, portugaliyalik muxlislarga rahmat aytishni istardim. Endi men ham sizlar kabi terma jamoa muxlisiga aylanaman”, — deydi Santush.

Santush qo‘l ostidagi jamoa JCH—2022 chorak finalida Marokashga yutqazib (0:1), musobaqa bilan xayrlashdi. Ushbu musobaqadan keyin Portugaliya futbol federatsiyasi mutaxassis bilan 2024-yilga qadar mo‘ljallangan shartnomani to‘xtatdi.

Santush 2014-yildan buyon buyon Portugaliyani boshqarib kelayotgan edi. Uning qo‘l ostida jamoa Yevro—2016 va 2019-yilgi Millatlar Ligasida g‘alaba qozongan.

Santush Portugaliya boshqaruvida 109 ta o‘yin o‘tkazdi. Ularda 67 ta g‘alaba, 19 ta mag‘lubiyat va 23 ta durang natija qayd etilgan.