Фернанду Сантуш: «Терма жамоада ишлар экансан қийин қарорлар чиқаришга мажбурсан ва ундан норозилар доим бўлади»

Португалия терма жамоаси собиқ бош мураббийи Фернанду Сантуш истеъфодан кейинги фикрлари билан ўртоқлашди.

«Жамоани улкан миннатдорчилик кайфиятида тарк этаман. Терма жамоа мураббийи бўлиш, ватан шаънини ҳимоя қилиш — улкан шараф. Бу мен амалга оширган орзу, эришган мақсад бўлди.

Мен билан 2014 йилдан шу вақтга қадар ишлаган барча футболчиларга раҳмат айтаман. Жамоани бошқарар экансан, қийин танловлар қилишингга тўғри келади ва албатта, қарордан норозилар доим бўлади. Бироқ доим қарорларни терма жамоа фойдасини кўзлаб чиқарганман.

Шунингдек, ҳамкасблар, федерация, бирга ишлаган барчага ташаккур айтаман. Ва албатта, португалиялик мухлисларга раҳмат айтишни истардим. Энди мен ҳам сизлар каби терма жамоа мухлисига айланаман», — дейди Сантуш.

Сантуш қўл остидаги жамоа ЖЧ—2022 чорак финалида Марокашга ютқазиб (0:1), мусобақа билан хайрлашди. Ушбу мусобақадан кейин Португалия футбол федерацияси мутахассис билан 2024 йилга қадар мўлжалланган шартномани тўхтатди.

Сантуш 2014 йилдан буён буён Португалияни бошқариб келаётган эди. Унинг қўл остида жамоа Евро—2016 ва 2019 йилги Миллатлар Лигасида ғалаба қозонган.

Сантуш Португалия бошқарувида 109 та ўйин ўтказди. Уларда 67 та ғалаба, 19 та мағлубият ва 23 та дуранг натижа қайд этилган.