“Daryo” nashri 14-dekabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
“Ukraina xalqi bilan birdamlik” nomli konferensiyada qayta portlashlar yuz berayotgan Ukraina uchun 100 mlrd yevro to‘plandi
Kiyevning Shevchenkivskiy tumanida portlashlar sodir bo‘ldi, deb xabar bermoqda shahar meri Vitaliy Klichko. 14-dekabr kuni ertalab Kiyev va Ukrainaning bir qator boshqa viloyatlarida havo hujumidan ogohlantirish e’lon qilindi.
Ukraina ommaviy axborot vositalarining yozishicha, Kiyev aholisi dron va portlash tovushlarini eshitgan, bir nechta chaqnashlar ko‘ringan. Kiyev viloyatida havo hujumidan ogohlantirish e’lon qilinganidan keyin havo hujumidan mudofaa tizimlari ishga tushdi, deb xabar bergan viloyat ma’muriyati rahbari Aleksey Kuleba.
Ayni vaziyatda Parijda, 70 dan ortiq davlat va tashkilotlar ishtirokida “Ukraina xalqi bilan birdamlik” nomli konferensiya bo‘lib o‘tdi. Konferensiya yakunida Fransiya prezidenti Emmanuel Makron Kiyev uchun 1 milliard yevrodan ortiq yordam yig‘ishga muvaffaq bo‘lganini ma’lum qildi.
AQSHda TikTok ijtimoiy tarmog‘ini taqiqlash taklif qilinmoqda
AQSHda respublikachi senator Marko Rubio Xitoyning TikTok qisqa videolar servisini taqiqlovchi qonun loyihasini taqdim etdi. Hujjat mualliflari ushbu ijtimoiy tarmoqdan amerikaliklarga qarshi josuslikda foydalanilishi mumkinligidan xavotirlanmoqda. Bu haqda senator saytida xabar berildi.
Qonun loyihasi Xitoy va Rossiya tomonidan nazorat qilinadigan yoki ularning ta’siri ostidagi har qanday ijtimoiy tarmoq dasturlariga qarshi qaratilgan. Rubio Xitoy qonunchiligi bo‘yicha TikTok’ning bosh kompaniyasi ByteDance Xitoy Kommunistik partiyasiga ma’lumotlarni taqdim etishi shartligini eslatdi.
“Federal hukumat AQSH foydalanuvchilarini TikTok tahdididan himoya qilish uchun hali biror muhim chora ko‘rmagan. Gap ijodiy videolar haqida emas, balki har kuni o‘n millionlab amerikalik bolalar va kattalar haqida ma’lumot to‘playdigan dastur haqida ketmoqda. Biz bundan xabarlarni manipulyatsiya qilish va saylovlarga ta’sir o‘tkazish uchun foydalanilayotganini bilamiz. Bu Xitoy Xalq Respublikasining javobi ekanidan xabarimiz bor”, — dedi senator.Vakillar palatasida tashabbusni respublikachi Mayk Gallaxer va demokrat Raja Krishnamurti qo‘llab-quvvatladi.
Germaniyada davlat to‘ntarishi va Olaf Sholsga suiqasd rejasi topildi
Germaniyada davlat to‘ntarishini uyushtirmoqchi bo‘lgan guruh mamlakat kansleri Olaf Sholsga suiqasd qilishni rejalashtirgan. Bu haqda tergovdan xabardor manbalarga tayanib, The New York Times xabar berdi.
Politsiya davlat to‘ntarishi uyushtirishni rejalashtirgan guruhning uyini tintuv qilganda, yuzdan ortiq “ma’lumotni oshkor qilmaslik” to‘g‘risidagi kelishuvlarni topgan.“Unga imzo chekkanlar guruhning Germaniya parlamentiga hujum qilish va uning a’zolarini hibsga olish, shuningdek, kanslerga suiqasdni o‘z ichiga olgan rejani sir saqlashga qasamyod qilgan”, deyiladi xabarda.
Ta’kidlanishicha, guruh a’zolaridan kimdir bu ma’lumotlarni ochiqlasa, o‘limga hukm qilinishi kerak bo‘lgan. Tintuv davomida politsiya 40 ga yaqin o‘qotar qurol va mingdan ortiq o‘q-dorilarni topgan, bu esa hali topilmagan o‘q-dorilar omborlari mavjudligidan dalolat beradi.
7-dekabr kuni Germaniya Bosh prokuraturasi matbuot xizmati davlat to‘ntarishiga tayyorgarlik ko‘rayotgan 25 kishi, jumladan, Rossiya fuqarolari hibsga olingani haqida xabar berdi.Gumonlanuvchilar 2021-yilda tuzilgan terrorchilik tashkiloti a’zosi va tarafdorlari bo‘lib, ularning maqsadi “Germaniyadagi mavjud siyosiy tizimni ag‘darish” bo‘lgani aytilgan.
Endilikda O‘zbekistonda ilmiy darajaga ega bo‘lgan tibbiyot xodimlari qo‘shimcha haq oladilar
O‘zbekistonda hukumat qarori davolash-profilaktika muassasalarining ilmiy darajaga ega bo‘lgan xodimlariga qo‘shimcha haq to‘lash tartibi to‘g‘risida nizom tasdiqlandi.
Shunga ko‘ra, muassasalarning fan doktori (Doctor of Science), fan nomzodi yoki falsafa doktori (PhD) ilmiy darajasiga ega bo‘lgan xodimlariga asosiy ish joyi bo‘yicha har oylik qo‘shimcha haq belgilanadi.
Qo‘shimcha haq miqdori xodimning egallab turgan lavozimiga mutanosib ravishda, biroq bir stavkadan ortiq bo‘lmagan miqdorda har oyda hisoblanadigan lavozim maoshiga nisbatan belgilanadi.
Xodim bir nechta muassasada qonunchilikda belgilangan tartibda mehnat shartnomasi asosida faoliyat yuritayotgan bo‘lsa, u asosiy ish joyi bo‘yicha qo‘shimcha haq olish huquqiga ega.Qo‘shimcha haq miqdori bir oyda — fan nomzodi yoki falsafa doktori ilmiy darajasiga ega xodimlar uchun lavozim maoshining 30 foizidan hamda fan doktori ilmiy darajasiga ega xodimlar uchun lavozim maoshining 60 foizidan oshmasligi kerak.
Izoh (0)