Ноябрь ойи ўрталарида Тиббий-ижтимоий хизматларни ривожлантириш агентлиги томонидан Товар-хом ашё биржасига 737 миллион сўмлик платформа яратиш бўйича тендер эълон қилинган эди. Унда бир нечта IT компаниялари иштирок этган ва ғолиб компания аниқланган. Тендерни ютиб олган компания агентлик томонидан қўйган техник шартларни 700 миллион сўмга 15 кун муддат ичида бажариб беришни ўз зиммасига олган.
Кам муддатда ва катта маблағ эвазига яратилаётган платформа айтилган суммага арзийдими ва у нимаси билан ўзига хос бўлади? «Дарё» мухбири ушбу саволлар юзасидан Тиббий-ижтимоий хизматларни ривожлантириш агентлигининг Ахборот-коммуникация технологиялари бўлими бошлиғи Ҳамза Ўразметовдан изоҳ олди.
Президент Шавкат Мирзиёевнинг март ойида қабул қилинган «Оила ва хотин-қизларни тизимли қўллаб-қувватлашга доир ишларни янада жадаллаштириш чора-тадбирлари тўғрисида»ги фармонида ногиронлиги бўлган шахслар томонидан тиббий ижтимоий ёрдам кўрсатиш бўйича давлат органларига онлайн видеоалоқа тизими орқали мурожаат қилиш платформасини яратиш кўзда тутилган.
Ҳамза Ўразметовнинг айтишича, фармонда назарда тутилган платформани ишлаб чиқиш учун август ойидан ишга киришилган.
«Агентликнинг имкониятидан келиб чиққан ҳолда 14 ноябрь куни платформани яратиш учун 737 миллион сўм эвазига тендер эълон қилинган. Аввал ўрнатилган тартиб бўйича платформанинг тахминий нархини аниқлаш мақсадида бир нечта IT компанияларига техник шартларимизни юбордик. Улар кўрсатган нарх баландроқ бўлса-да, агентликдаги мавжуд маблағдан келиб чиққан ҳолатда эълон беришимизга тўғри келди. Қайси IT компанияларда биз талаб қилган имконияти бўлса тендерда қатнашди ва улар орасидан биттаси ғолиб бўлди», — деди Ҳамза Ўразметов
Агентлик масъул ходимнинг таъкидлашича, ғолиб бўлган компанияга 3 та тизим яратиб бериш шарти қўйилган ва бу ишни бажариш учун 15 кун муддат берилган.
«Платформанинг биринчи қисмида мобил илова яратилади. Иловадан ногиронлиги бўлган шахслар рўйхатдан ўтиши, видео, фото ва матн кўринишида мурожжат ёллаш имконияти берилади. Шунингдек, мурожаат қилувчи ўз манзилини илованинг ўзидан танлаган ҳолда кўрсатиш имконияти бўлади. Иккинчи қисмида эса платформадан 61 та вазирлик ва идораларга алоҳида бўлиб ажратилади ва улар мурожаатларни тегишлилиги бўйича жавоб беришлари мумкин бўлади», — деди у.
Қўшимча қилинишича, ғолиб компанияга учинчи иш сифатида Брайл алифбоси ва имо-ишора тилини ўрганиш истагидагиларни рўйхатга олиш ва уларни Халқ таълими ҳамда Бандлик ва меҳнат муносабатлари вазирлигига йўналтирувчи тизим ишлаб чиқиш юклатилган.
Юқорида санаб ўтилган 3 та техник шартларни ғолиб компания 700 миллион сўм эвазига 15 кун муддатда тугаллаши бўйича агентлик икки томонлама шартнома имзоланган. Демак, 2022 йилнинг сўнгига қадар платформа ишга тушиши керак.
Изоҳ (0)