Navoiyda 454 kishining bank kartalaridagi pullarni o‘zlashtirgan bir guruh fuqarolarga nisbatan jinoyat ishi qo‘zg‘atildi. Bu haqda IIV Kiberxavfsizlik markazi matbuot xizmati xabar qildi.
Ma’lum qilinishicha, Navoiy viloyati Zarafshon shahrida yashovchi N.M., ariza bilan murojaat qilib, Telegram’da noma’lum shaxs feyk xabar orqali uning bank kartasi boshqaruvini qo‘lga kiritib, jami 2 million 780 ming so‘m pullarini yechib olganligini bildirib, noma’lum shaxsga nisbatan qonuniy chora ko‘rishni so‘ragan.
Olib borilgan tezkor-qidiruv tadbirlari natijasida ushbu jinoyatni bir guruh shaxslar o‘zaro jinoiy til biriktirib sodir etgani aniqlangan.
Jinoiy guruh a’zolari Navoiy viloyati Xatirchi tumanida yashovchi, muqaddam Jinoyat kodeksining 168-moddasi bilan sudlangan, 2006-yilda tug‘ilgan A.A. va uning akasi 2001-yilda tug‘ilgan A.Sh., Buxoro viloyati Kogon tumanida yashovchi, Tojikistonda 1985-yilda tug‘ilgan N.B. va uning o‘g‘li 2006-yilda tug‘ilgan B.D. ekani ma’lum bo‘lgan.
Guruh soxta havolalardan foydalanib, Telegram’dagi guruh va kanallarda yolg‘on xabarlarni tarqatib jami 454 nafar fuqaroning bank kartalari boshqaruvini qo‘lga kiritib juda ko‘p miqdordagi pullarni o‘zlashtirgan.
Guruh a’zolariga nisbatan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari olib borilmoqda.
Mavzuga doir:
Izoh (0)