Навоийда 454 кишининг банк карталаридаги пулларни ўзлаштирган бир гуруҳ фуқароларга нисбатан жиноят иши қўзғатилди. Бу ҳақда ИИВ Киберхавфсизлик маркази матбуот хизмати хабар қилди.
Маълум қилинишича, Навоий вилояти Зарафшон шаҳрида яшовчи Н.М., ариза билан мурожаат қилиб, Telegram’да номаълум шахс фейк хабар орқали унинг банк картаси бошқарувини қўлга киритиб, жами 2 миллион 780 минг сўм пулларини ечиб олганлигини билдириб, номаълум шахсга нисбатан қонуний чора кўришни сўраган.
Олиб борилган тезкор-қидирув тадбирлари натижасида ушбу жиноятни бир гуруҳ шахслар ўзаро жиноий тил бириктириб содир этгани аниқланган.
Жиноий гуруҳ аъзолари Навоий вилояти Хатирчи туманида яшовчи, муқаддам Жиноят кодексининг 168-моддаси билан судланган, 2006 йилда туғилган А.А. ва унинг акаси 2001 йилда туғилган А.Ш., Бухоро вилояти Когон туманида яшовчи, Тожикистонда 1985 йилда туғилган Н.Б. ва унинг ўғли 2006 йилда туғилган Б.Д. экани маълум бўлган.
Гуруҳ сохта ҳаволалардан фойдаланиб, Telegram’даги гуруҳ ва каналларда ёлғон хабарларни тарқатиб жами 454 нафар фуқаронинг банк карталари бошқарувини қўлга киритиб жуда кўп миқдордаги пулларни ўзлаштирган.
Гуруҳ аъзоларига нисбатан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари олиб борилмоқда.
Мавзуга доир:
Изоҳ (0)