Sahna ortidagi janjal, Sitoraning kelinsalomi, “Mario” va “I operatsiyasi”. “Dizayn shou”ning yangi konsert dasturidan reportaj (video)
“Dizayn” jamoasi a’zolarining taklifiga ko‘ra “Daryo” muxbirlari bu yilgi sarhisob konsert dasturiga borib, sahna orti jarayonlari haqida reportaj tayyorlashdi.
Eslatib o‘tamiz, “Dizayn” jamoasi 2005-yilda Toshkent to‘qimachilik va yengil sanoat institutini talabalari tomonidan tashkil etilgan. Ular institut nomidan “Quvnoqlar va zukkolar” tanlovida ishtirok etib, tomoshabinlar e’tiboriga tushgan. Jamoa a’zolari ilk yakkaxon konsert dasturini 2010-yili “Turkiston” saroyida taqdim etgan.
Konsert avvalida jamoa a’zolarini qo‘llab-quvvatlash uchun ko‘plab ustoz san’atkorlar va hamkasblari tashrif buyurishdi.
Hech bir ish duosiz boshlanmaydi, jamoa a’zolari ham har bir chiqishidan avval duo olishga odatlanishgan.
Konsertga Sa’dulla Fathullayevning onasi ham tashrif buyurdi va jamoani tanqid qiladiganlarga o‘z munosabatini bildirdi.— Hammaga yoqish juda qiyin. “Dizayn”chilarni tanqid qilishsa jahlim chiqadi. Ammo shunda ham o‘g‘limga hech kimga og‘ir gapirma, xafa qilma deb uqtiraman. San’at boshqa kasblardan farq qiladi. Bu sohada ishlash uchun “temirdan tish bo‘lish kerak” deb bekorga aytishmas ekan, — deydi Surayyo Fathullayeva.
Jamoa a’zolari bir necha yildan buyon aynan dekabr oyida konsert berishga odatlanishgan. Buning sababini so‘raganimizda, aktrisa Sitora Farmonova quyidagicha javob berdi:— Bu savolni o‘zimga ham beraman. Nega aynan qishda konsert berishimiz kerak? Havo sovuq bo‘lishiga qaramay, zal muxlislar bilan to‘la ekanligini ko‘rib, xursand bo‘laman, — deydi aktrisa.
— Bu yilgi konsert boshqalariga o‘xshamaydi. Chunki har yili avvalgi ommalashgan hazillarning davomini qilardik. Bu yilgi hazillar o‘zgacha. Faqatgina Erik Haydarning oilasiga alohida e’tibor qaratdik, — deydi jamoa a’zosi Elmurod Haqnazarov.
O‘zbekistonda xizmat ko‘rsatgan artist Muhammadiso Abdulhayirov ham jamoaning hazillarida ishtirok etdi.
“Qah-qaha” guruhi a’zolari ham konsertga tashrif buyurib, ularni ustoz sifatida konsertiga taklif etgan “Dizayn” yigitlariga minnatdorlik bildirishdi.
Bu yilgi shou Sitora Farmonovaning kelinsalomi bilan boshlandi.
— Shu kungacha birorta sahna ko‘rinishida qo‘shiq kuylamagandim. Bu yilgi chiqish umuman boshqacha bo‘ldi, — deydi aktrisa.
Erik Haydarning oila a’zosi rolida — Abdurahmon Mavlonov.
Qobil Karimberdiyev sahnaga chiqishga tayyorgarlik ko‘rayapti.
Bu yilgi konsert qo‘shiq va raqslarga boy bo‘ldi. Xonanda Davron Ergashev mehmon san’atkor sifatida tashrif buyurib “Mario” qo‘shig‘ini ijro etdi.
Erik Haydarning noodatiy imidji mana shunday yaratiladi.
Jamoa a’zolari har yilgi konsertda mashhur filmga porodiya tayyorlashadi. Bu yil ular “I operatsiya” filmi voqealarini sahnada ko‘rsatishdi.
Shurik rolida Dilshod Musaboyev.
Konsert yakunida jamoa a’zolarining oila a’zolari, hamkasblari va ashaddiy muxlislari sahna ortiga o‘tib, ularni tabriklashmoqda.
Sahna ortida Qobil Karimberdiyevning biroz tobi yo‘qligi sezildi. Ammo u tomoshabinlar buni payqashlariga yo‘l qo‘ymadi.
Jamoa a’zolari imkoniyati cheklangan ashaddiy muxlisini sahna ortiga taklif qilib, u bilan suratga tushishdi.
Agar sahna orti jarayonlar qanday kechishini ko‘rishni istasangiz, quyidagi videoni tomosha qiling.
Mavzuga doir:
Janob Rasulning jonli ijrodagi ilk yakkaxon konsert dasturidan reportaj (foto, video)
