Janob Rasulning jonli ijrodagi ilk yakkaxon konsert dasturidan reportaj (foto, video)
Qoraqalpog‘istonda xizmat ko‘rsatgan artist Janob Rasul poytaxtdagi “Xalqlar do‘stligi” san’at saroyida ilk jonli konsert dasturini taqdim etdi. Xonandaning taklifiga ko‘ra “Daryo” muxbirlari konsertdan foto va videoreportaj tayyorlashdi. Bu reportaj orqali nafaqat sahnadagi, balki sahna ortidagi tayyorgarlik jarayonlari bilan ham tanishishingiz mumkin.
Xonanda shu kuni kuchli hayajonda ekanligini yashirmadi. Chunki u “Daryo”ga bergan intervyusida yangi dasturga ko‘ngildagidek tayyorgarlik ko‘rolmaganini yashirmagandi.
Konsert oldidagi asosiy tayyorgarlik jarayonlari ana shunday bo‘ladi. Raqqosalar tomoshabinsiz sahnada raqs tushishadi, xonandalar esa qo‘shiq kuylashadi.
Konsertning muvaffaqiyatli o‘tishi ko‘p jihatdan ovoz kuchaytirish uskunalariga ham bog‘liq. Ammo konsertning ilk kunidagi texnikalardan xonandaning ko‘ngli to‘lmadi. Buni tayyorgarlik jarayonida ham bir necha bor ta’kidladi.
Tayyorgarlik jarayonlari nihoyasiga yetib, konsert boshlandi. Xonanda dasturni duet tarona bilan boshladi. U Hilola Samirazar bilan “Sevgisi yolg‘onim” nomli qo‘shiqni kuyladi.
Janob Rasul yosh va hali xalq orasida tanilib ulgurmagan duetdoshi bilan mashhur turk qo‘shig‘ini ham ijro etdi.
Xonandani ko‘pchilik sho‘x va raqsbop qo‘shiq kuylaydi deb hisoblaydi. Ammo uning ota-ona va do‘st haqidagi dardli qo‘shiqlari ham bor. Jonli ijrodagi konsertda ana shunday qo‘shiqlardan bir nechtasi yangradi.
Konsert davomida texnik uskunalarning jonli ijroga tayyor emasligi ko‘p bora sezildi. Bu nafaqat xonandaga balki, tinglovchilarga ham ko‘plab noqulayliklarni tug‘dirdi.
Konsertga nafaqat O‘zbekiston, balki Qozog‘iston va Tojikistondan ham muxlislar tashrif buyurishdi. Muxlislar qo‘shni respublikalardan tashrif buyurishganini aytishganda, xonanda ularga alohida minnatdorlik bildirdi. U bir nechta qo‘shiqlarini xalq bilan birga ijro etdi.
Dastur davomida xonandaning yangi “Korolyeva” nomli qo‘shig‘iga ishlangan klip premyera qilindi. Xonanda premyera so‘ngida klip va dastur rejissorini xalqqa tanishtirdi.
Dastur boshlovchisi Shukrullo Isroilov doimiy an’anasini davom ettirib, bu galgi dasturda ham bir nechta muxlislarni sahnaga taklif etdi. Ular Janob Rasulning qo‘shiqlarini ijro etishdi.
— Konsertda duet kuylamoqchi edik. Ammo Janob Rasul jonli ijroda konsert berishini eshitgach, rad etdim, — dedi Jahongir Poziljonov.
Shu bois Janob Rasul “Bojalar” guruhi repertuaridagi “Jiyda guli” qo‘shig‘ini o‘z uslubida ijro etdi.
Xonanda onasini xalqqa tanishtirib, otasining bugungi konsertda yo‘qligidan armon qilayotganini aytib o‘tdi. U ota-onalarga bag‘ishlangan qo‘shig‘ini ko‘z yoshisiz ijro etolmadi.
Xonanda konsertni Qoraqalpog‘iston va O‘zbekistonni madh etuvchi qo‘shiqlari bilan yakunladi. Dastur ko‘tarinki ruhda o‘tdi. Ammo xonanda dasturning ilk kunidagi ovoz kuchaytirish uskunalari sabab undan ko‘ngli biroz to‘lmaganini ma’lum qildi.
Videoni quyida to‘liq tomosha qilishingiz mumkin.
Mavzuga doir:
- “To‘rt farzandim bor, ammo ularni ommaga ko‘rsatmayman” — xonanda Janob Rasul oilasi va otasi haqidagi armonlari haqida (video)
- “Topganimni hisoblasam, shu paytgacha uymas, aeroport qurishim kerak edi”. Janob Rasul to‘ylardan qancha topishi hamda 400 ming dollarlik uyi haqida gapirdi (video)
- “ ‘Dada, parhez qilmasangiz, o‘lasiz’, derdim”. Janob Rasul otasining vafotidan oldin ko‘p koyigani, endi esa uni sog‘inayotgani haqida (video)
- Janob Rasul YouTube’dan yiliga 100 ming AQSH dollari olishi hamda 30 ming dollar sarflagan klipi haqida (video)
