Farg‘ona viloyatining turli hududlarida hujra sharoitida noqonuniy diniy saboq berganlar qo‘lga tushdi.
Ma’lum bo‘lishicha, Yozyovon tumanida yashovchi 1991-yilda tug‘ilgan fuqaro o‘z uyida, hech qanday maxsus diniy ma’lumot va ruxsatnomaga ega bo‘lmasdan, voyaga yetmagan 6 nafar bolaga iyun oyidan buyon diniy saboq berib kelgan. Bolalar aynan shu xonadonda yashagan.
Shuningdek, Qo‘shtepa tumanida ham shunga o‘xshash holat qayd etilgan. 1975-yilda tug‘ilgan ayol o‘z yashash manzilida hujra tashkil etib, Marg‘ilon shahrining turli mahallalarida yashovchi 2009–2015-yillarda tug‘ilgan qizlarga diniy ta’lim bergan.
Dang‘ara tumanida ham ruxsatsiz diniy saboq berish holati fosh etilgan. Bu gal 1963-yilda tug‘ilgan fuqaro uyida 2011–2015-yillarda tug‘ilgan 4 nafar bolaga diniy saboq bergan.
Bundan tashqari, Farg‘ona tumani “Vodil” mahallasida joylashgan xususiy o‘quv markazida ham qonunbuzarlik aniqlangan. 1997-yilda tug‘ilgan fuqaro 28 nafar voyaga yetmagan bolaga diniy saboq bergani ma’lum bo‘ldi.
Huquqni muhofaza qiluvchi organlar barcha holatlar yuzasidan tegishli hujjatlarni rasmiylashtirib, ishni sud organlariga yuborgan.
O‘zbekistonda farzandini noqonuniy diniy ta’lim olishga jalb etganlik uchun ma’muriy javobgarlik belgilandi.
Qonun rasmiy e’lon qilingan kundan e’tiboran kuchga kirdi. Ushbu qonun loyihasi 2024-yil 25-iyun kuni deputatlar tomonidan birinchi o‘qishda qabul qilingandi. Oliy Majlis Senatining 16-avgustdagi yalpi majlisida qonun ma’qullandi.
Qonunchilik palatasi spikeri o‘rinbosari Odiljon Tojiyev buni ayrimlar qonunni noto‘g‘ri talqin qilayotgani sabab bola huquqlari kafolatlarini kuchaytirishga oid qonun bo‘yicha izoh bergandi.
“Ta’lim to‘g‘risida”gi qonunga ko‘ra, bolaning umumiy o‘rta, o‘rta maxsus ta’lim olishini ta’minlash, uning intellektual, ma’naviy va jismoniy rivojlanishiga sharoit yaratish ota-onalar majburiyati hisoblanadi. Biroq Odiljon Tojiyev hozirgi kunda bolalarning noqonuniy diniy saboq olishiga, davlatning majburiy ta’lim tizimi ta’siridan chetda qolishiga hamda ularda biryoqlama dunyoqarash va mutaassiblik kayfiyati shakllanishiga ota-onalarning o‘zi sababchi bo‘lib qolayotganini aytgandi.
Xususan, noqonuniy diniy ta’lim berish asosan ota-onalar tashabbusi bilan “hujra” sharoitida tashkil etilmoqda. Oxirgi 5 yilda “hujra”da diniy ta’lim olgan 9 705 nafar bola aniqlangan. Aksariyat hollarda ota-onalar o‘z bolalarini diniy ta’lim berish huquqi bo‘lmagan tashkilot yoki shaxs ixtiyoriga bir necha oyga qarovsiz tashlab ketishi kuzatilmoqda. Bu orada bola to‘laqonli shaxs sifatida rivojlanishi uchun zarur bo‘lgan muhitdan uzilib qolmoqda.
Yuqoridagi xatti-harakat yuridik tilda “bolani qonunga xilof ravishda diniy ta’lim olish jarayoniga jalb qilish”deb bayon qilingan. Qisqa qilib aytganda, ota-ona bolasini ‘hujra’ga topshirsa, javobgar bo‘ladi. Hujralar faoliyati esa ko‘p yillardan beri qonun bilan qat’iy taqiqlangan, degan edi Odiljon Tojiyev.
Shuningdek, bu narsa ota-onaning o‘z farzandiga diniy saboq, ta’lim-tarbiya berishiga umuman aloqasi yo‘qligini, chunki bu har qanday ota-onaning o‘z farzandini shaxsan o‘zi tarbiya qilish bo‘yicha daxlsiz huquqi hisoblanishini qayd etib o‘tgandi.
- Andijon va Xorazmdagi noqonuniy hujralarda tahsil olayotgan bolalarga jarohat yetkazilgani aniqlandi.
- Farg‘onada bolalarga noqonuniy diniy saboq berayotgan shaxs ushlandi.
- Farg‘onada hujra tashkil qilib, noqonuniy diniy saboq berayotganlar qo‘lga tushdi.
- Qo‘qonda “Hizb ut-tahrir”ning yashirin guruhi a’zolari qamoqqa olindi.
Izoh (0)