Toshkentda ob-havo sabab avtobuslar oraliq interval vaqtlari ortishi mumkin

Toshkentda noqulay ob-havo sabab avtobuslar oraliq interval vaqtlari ortishi mumkin. Bu haqda “Toshshahartransxizmat” matbuot xizmati xabar berdi.

Qayd etilishicha, noqulay ob-havo sharoitida avtotransport vositalari harakatlanishida noqulayliklar yuzaga kelishi sababli ayrim avtobus yo‘nalishlaridagi qatnov va oraliq interval vaqtlarining belgilangan vaqtlardan ortishi holatlari yuzaga kelishi mumkin.

“Ob-havoning keskin o‘zgargani, qor yog‘ishi va avtomobil yo‘llarida muzlamalar hosil bo‘lgani sababli barcha haydovchilardan transport vositasini boshqarish paytida murakkab ob-havo sharoitini hisobga olishlarini, zarurat bo‘lmaganda shaxsiy avtomobillarida, ayniqsa, qishga mo‘ljallangan shinalarga ega bo‘lmagan transport vositalarida harakatlanmaslikni, tezlik talablariga qat’iy amal qilishlarini, piyodalardan yo‘lni kesib o‘tishda o‘ta hushyor bo‘lishlarini, kattalardan yo‘llarda bolalarning harakatini nazoratga olishlarini so‘raymiz”, — deyiladi xabarda.

Poytaxtda 4-dekabr kuni qor yog‘a boshlagandi. “O‘zgidromet” ma’lumotiga ko‘ra, 5-dekabr kuni ham qor yog‘ishi davom etadi, yo‘llarda yaxmalak yuzaga keladi.

Mavzuga doir: Toshkentdagi gaz zapravkalari vaqtinchalik yopilmoqda