Yevrokomissiya: Urushda 100 ming ukrainalik askar va 20 ming tinch aholi halok bo‘ldi (video)
Rossiyaning Ukrainaga bosqini boshlanganidan beri 20 mingdan ortiq tinch aholi va Ukraina Qurolli kuchlarining 100 mingdan ortiq harbiy xizmatchilari halok bo‘ldi. Ushbu hisobni Yevropa komissiyasi rahbari Ursula fon der Lyayen o‘z bayonotida keltirdi.
“Rossiya harbiy jinoyatlari uchun javob berishi kerak”, — dedi Yevropa komissiyasi rahbari. U Rossiyaning Ukrainadagi harbiy jinoyatlarini tergov qilish uchun BMT tomonidan qo‘llab-quvvatlanadigan maxsus sud yaratishni taklif qildi.
Yevrokomissiya rahbarining aytishicha, Rossiya Ukrainaga yetkazilgan moliyaviy zararni ham qoplashi kerak, uning hisob-kitoblariga ko‘ra, bu hozirgacha 600 milliard yevrodan oshgan. Ushbu maqsadlar uchun YI Rossiya Markaziy bankiga qarashli 300 milliard yevro va rossiyalik oligarxlarga tegishli 19 milliard yevro mablag‘ni muzlatib qo‘ygan.
29-noyabr kuni kechqurun Ukraina prezidenti Vladimir Zelenskiy urushning 279-kuni yakunlari bo‘yicha yo‘llagan murojaatida Rossiyaning harbiy yo‘qotishlariga baho berdi.
“Ular Donbassga muntazam armiyalarini joylashtirmoqda, u yerda har kuni yuzlab safarbar qilingan va yollanma askarlaridan ayrilmoqda, u yerda chekinishga qarshi otryadlardan foydalanmoqda. Bu yil Rossiya hali 100 ming askarini yo‘qotadi, yana qancha yollanma jangchisidan ayriladi, buni faqat xudo biladi. Ukraina esa tik turadi”, — dedi u.
29-noyabr kungi boshqa nutqida Zelenskiy Ukrainani urushdan keyingi rekonstruksiya qilish qiymati allaqachon trillion dollardan ko‘proqqa baholanganini aytdi.
Urush boshlanganidan beri Rossiya Mudofaa vazirligi Ukrainadagi yo‘qotishlari haqida bor-yo‘g‘i uch marta, oxirgi safar 21-sentabrda, Rossiyada safarbarlik boshlangan kuni xabar berdi. O‘shanda mudofaa vaziri Sergey Shoygu jangovar harakatlar paytida 5937 nafar rus askari halok bo‘lganini aytdi.
Noyabr oyi boshida AQSH shtab boshliqlari birlashgan qo‘mitasi rahbari Mark Milli rossiyalik qo‘shinlar orasida halok bo‘lgan va yaralanganlar soni 100 ming kishidan oshganini aytdi. Uning fikricha, Ukraina tomoni ham xuddi shunday yo‘qotishlarga uchragan.
Ukraina Qurolli kuchlari Bosh shtabi 30-noyabr kuni ertalab Rossiya armiyasining urushdagi yo‘qotishlari 89 mingga yaqinlashayotganini ma’lum qildi. Ukraina Qurolli kuchlari o‘z yo‘qotishlari haqida ma’lumot bermayapti.
