Afg‘onistonda “Tolibon” Taxor viloyatidagi maktabda o‘z jangchisining nikoh marosimini o‘tkazdi. Bu haqda Hasht-e Subh Daily xabar berdi.
Ma’lumotlarga ko‘ra, marosim “Sayed Husayn Shahid” maktabida bo‘lib o‘tgan va unda faqat erkaklar qatnashgan. To‘y ishtirokchilari maktab binosida ovqatlangan. “Tolibon” hech kimga surat yoki video olishga ruxsat bermagan.
“Tolibon” hokimiyat tepasiga kelganidan keyin ayollarga turli taqiqlar joriy etdi. Xususan, ayollar erkak yo‘lboshchisiz shifoxonaga borishi va ko‘rikdan o‘tishi mumkin emas. Bundan tashqari ayollarga SIM karta sotib olish, istirohat bog‘iga tashrif buyurish taqiqlangan. Yevropa Ittifoqi esa “Tolibon”ning ayollarga nisbatan yangi cheklovlarini qoralagan.
