Россия Европа Иттифоқи ташаббуси билан Россиянинг Украинадаги ҳаракатларини текширадиган махсус трибунал яратишни қонуний деб тан олмайди. Бу ҳақда Россия президенти матбуот котиби Дмитрий Песков «РБК»га маълум қилди.
«Аллақандай трибуналлар тузишга уринишлар масаласига келсак, улар ҳеч қандай қонунийликка эга бўлмайди, биз томондан қабул қилинмайди ва қораланади», — деди Песков.
Шу билан бирга, Песковнинг таъкидлашича, россиялик терговчилар «ҳар куни ва деярли ҳар соатда Киев режимининг жиноятларини қайд этиш» устида ишламоқда. Москва 2014 йилдан бери Киев томонидан содир этилган «жиноятлар»ни ҳам ўрганмоқчи. Ғарб давлатлари Украинанинг бундай ҳаракатларига муносабат билдирмаган, деб қўшимча қилди у.
30 ноябрь куни Еврокомиссия раҳбари Урсула фон дер Ляен Россиянинг Украинадаги ҳаракатларини текшириш учун БМТ кўмагида махсус трибунал ташкил этишни таклиф қилганди.
Кейинроқ Франция Европа ва украиналик ҳамкорлари билан биргаликда Россиянинг Украинадаги «агрессив жиноятлари» бўйича махсус трибунал яратиш устида иш бошлаганини маълум қилди.
Россиянинг БМТдаги доимий вакили Василий Небензя трибунал ташаббусини «ўз қонунбузарлигини яширишга уриниш» ва «БМТ нуфузи ортига бекиниш» деб атади. Россиянинг БМТ Женева штаб-квартирасидаги доимий вакили Геннадий Гатиловнинг таъкидлашича, трибунални ташкил этиш учун бу ташаббус БМТ Хавфсизлик кенгашида маъқулланиши керак.
Европа Иттифоқининг аноним расмийлари The Washington Post билан суҳбатда махсус трибунал яратиш таклифини БМТ Хавфсизлик Кенгашидан ўтказиб бўлмаслиги (Россия у ерда вето ҳуқуқига эга), аммо бу БМТ Бош Ассамблеяси орқали амалга оширилиши мумкинлиги ҳақида фикр билдирган.
Изоҳ (0)