Toshkent shahrining Yakkasaroy tumanida fuqaroni urgan mahalla raisi ishdan olindi. Bu haqda “Daryo”ga tuman hokimligi axborot xizmati rahbari Otabek Nasimov xabar berdi.
Ma’lum bo‘lishicha, ijtimoiy tarmoqlarda Yakkasaroy tumanidagi “Armug‘on” MFY raisining fuqaroni kamsitgani hamda tepgani ko‘ringan videolavha tarqalgan.
Bugun “Armug‘on” mahalla guzarida holat bo‘yicha Yakkasaroy tuman hokimligi tashkiliy-kadrlar guruhi rahbari O.Rixsiboyev, tuman Mahalla va nuroniylarni qo‘llab-quvatlash bo‘limi boshlig‘i I.Hayitxo‘jayev hamda tuman Mahalla va nuroniylarni qo‘llab-quvvatlash bo‘limi boshlig‘inining maslahatchisi T.Sayfullayevlar ishitrokida yig‘ilish o‘tkazildi. A’zam Qodirov bajarayotgan vazifasiga nomunosib xatti-harakatlarni amalga oshirgani uchun 2022-yilning 28-noyabridan mahalla raisi lavozimidan ozod qilindi, — deydi Otabek Nasimov.
Mazkur holat yuzasidan Toshkent shahar IIBB ham munosabat bildirdi.
“Joriy yilning 27-noyabr kuni taxminan soat 12:30 larda 1963-yilda tug‘ilgan A.Q. jamoat joyida, ya’ni Yakkasaroy tumani KXAY ko‘chasida 1973-yilda tug‘ilgan I.I. bilan o‘zaro kelib chiqqan og‘zaki mojaro sababli bir marotaba orqasidan tepgan. Mazkur holat yuzasidan Ma’muriy javobgarlik to‘g‘risidagi kodeksning 183-moddasi (mayda bezorilik) bilan ma’muriy bayonnoma rasmiylashtirildi. Sud tomonidan huquqbuzarga nisbatan tegishli ta’sir choralari ko‘rilishi ta’minlanadi”, — deyiladi rasmiy munosabatda.
Izoh (0)