Тошкентда фуқарони тепган маҳалла раиси ишдан олинди

Тошкент шаҳрининг Яккасарой туманида фуқарони урган маҳалла раиси ишдан олинди. Бу ҳақда «Дарё»га туман ҳокимлиги ахборот хизмати раҳбари Отабек Насимов хабар берди.

Маълум бўлишича, ижтимоий тармоқларда Яккасарой туманидаги «Армуғон» МФЙ раисининг фуқарони камситгани ҳамда тепгани кўринган видеолавҳа тарқалган.

Бугун «Армуғон» маҳалла гузарида ҳолат бўйича Яккасарой туман ҳокимлиги ташкилий-кадрлар гуруҳи раҳбари О.Рихсибоев, туман Маҳалла ва нуронийларни қўллаб-қуватлаш бўлими бошлиғи И.Ҳайитхўжаев ҳамда туман Маҳалла ва нуронийларни қўллаб-қувватлаш бўлими бошлиғинининг маслаҳатчиси Т.Сайфуллаевлар ишитрокида йиғилиш ўтказилди. Аъзам Қодиров бажараётган вазифасига номуносиб хатти-ҳаракатларни амалга оширгани учун 2022 йилнинг 28 ноябридан маҳалла раиси лавозимидан озод қилинди, — дейди Отабек Насимов.

Мазкур ҳолат юзасидан Тошкент шаҳар ИИББ ҳам муносабат билдирди.

«Жорий йилнинг 27 ноябрь куни тахминан соат 12:30 ларда 1963 йилда туғилган А.Қ. жамоат жойида, яъни Яккасарой тумани КХАЙ кўчасида 1973 йилда туғилган И.И. билан ўзаро келиб чиққан оғзаки можаро сабабли бир маротаба орқасидан тепган. Мазкур ҳолат юзасидан Маъмурий жавобгарлик тўғрисидаги кодекснинг 183-моддаси (майда безорилик) билан маъмурий баённома расмийлаштирилди. Суд томонидан ҳуқуқбузарга нисбатан тегишли таъсир чоралари кўрилиши таъминланади», — дейилади расмий муносабатда.

Мавзуга доир: Қашқадарёда 38 ёшли аёл ва 19 ёшли қиз ўзини поезд тагига ташлаб, жонига қасд қилди. МФЙ раисларидан бири бу ахборотни яшириб, «маҳалланинг сири» демоқда