O‘zbekistonda qaysi hududlar sabzavot yetishtirishda yetakchi?

2022 yil yanvar—sentabr oylarida O‘zbekistonda 8 mln tonna sabzavotlar yetishtirilgan. Bu haqda Davlat statistika qo‘mitasi xabar bermoqda.

Sabzavotlar yetishtirish hajmi 2021-yilning mos davriga nisbatan 2,8 foizga oshgan.

Hududlar kesimida yetishtirilgan sabzavotlar hajmida Andijon viloyati yetakchilik qilmoqda — 1,3 mln tonna. Ikkinchi o‘rinda Samarqand (1,2 mln tonna), uchinchi o‘rinda Surxondaryo (876 ming tonna) viloyatlari joylashgan.

O‘zbekiston hududlarida yetishtirilgan sabzavotlar hajmi bo‘yicha Farg‘ona viloyati to‘rtinchi o‘rinda — 819 ming tonna.

Beshinchi o‘rinni Toshkent (800 ming tonna), oltinchi o‘rinni Buxoro (674 ming tonna), yettinchi o‘rinni Namangan (613 ming tonna), sakkizinchi o‘rinni Xorazm (404 ming tonna) viloyatlari egallagan.

Bu ko‘rsatkich bo‘yicha keyingi o‘rinlarda Qashqadaryo (403 ming tonna), Jizzax (308 ming tonna), Sirdaryo (215 ming tonna), Navoiy (214 ming tonna) viloyatlari va Qoraqalpog‘iston (201 ming tonna) joylashgan.

Shuningdek, O‘zbekistonda 2022-yilning yanvar—oktabr oylarida xorijga meva va sabzavotlar eksport qilgan hududlar ma’lum qilindi.

Qayd etilishicha, Farg‘ona viloyati o‘n oyda chet elga meva va sabzavotlar sotish bo‘yicha yetakchi bo‘lgan — 261,1 ming tonna.

Toshkent viloyati 184,7 ming tonnalik mahsulotlar eksport qilgan va o‘tgan oyga nisbatan Samarqandni ortda qoldirib ikkinchi bo‘lgan. Samarqand viloyati esa yil boshidan beri 162,2 ming tonna meva va sabzavotlar eksport qilgan hamda uchinchi o‘ringa tushib ketgan.

Qolgan hududlarda ko‘rsatkichlar quyidagicha:

• Surxondaryo viloyati — 134,7 ming tonna;
• Xorazm viloyati — 132,3 ming tonna;
• Namangan viloyati — 123 ming tonna;
• Andijon viloyati — 98,2 ming tonna;
• Toshkent shahri — 81 ming tonna;
• Jizzax viloyati — 69,4 ming tonna;
• Buxoro viloyati — 63,5 ming tonna;
• Qashqadaryo viloyati — 43,1 ming tonna;
• Sirdaryo viloyati — 41,1 ming tonna;
• Qoraqalpog‘iston R. — 21,3 ming tonna;
• Navoiy viloyati — 9,8 ming tonna.

2022-yil yanvar—oktabr oylarida meva-sabzavot mahsulotlari jami eksportning 5,8 foizini tashkil etdi.

Xuddi shu davrda O‘zbekiston qiymati 903,3 million dollarga teng bo‘lgan 1,4 million tonna meva va sabzavotlar eksport qilgan.