Global talab zaiflashayotgani sabab dunyoda narxlar pasayishi kutilmoqda
Focus Economics prognoziga ko‘ra, 2022-yilda eng yuqori cho‘qqiga ko‘tarilgan narxlardan so‘ng, global talabning zaiflashishi fonida kelgusi yilda tovarlar qiymati pasayadi. Bu haqda “Kommersant” xabar bermoqda.
Shunga qaramay, kompaniya tomonidan so‘rov o‘tkazilgan iqtisodchilarning taxminicha, ta’minot tomonidan cheklovlar sabab narxlarda ancha yuqori daraja saqlanib qoladi.
Hozirda sanksiyalarning kuchayishi, Ukrainadagi urushning rivojlanishi va jahon iqtisodiyotidagi hozirgi vaziyat asosiy xavflar bo‘lib qolmoqda.
Energiya narxlari ikkinchi chorakda eng yuqori cho‘qqiga chiqdi — umumiy indeks deyarli 240 punktga ko‘tarildi, uchinchi chorakda u 210 punktga tushdi va keyingi yilning oxiriga kelib 180 ga tushishi kutilmoqda.
Neft bozorida OPEK+ ishlab chiqarishni qisqartirish va Yevropaning neft va neft mahsulotlariga bo‘lgan embargosi narxlarni yuqori darajada ushlab turishi kutilmoqda.
O‘tgan haftada Xitoyda COVID-19 ga qarshi cheklovlarning kuchaytirilishi tufayli bir barrel Brent neftining narxi 84 dollardan pastga tushdi.
Iqtisodchilar kelgusi yilda narxlarning pasayishini kutmoqda, ammo bozorda defitsit kuzatilmoqda. Eng past narx prognozi bir barrel uchun 69 dollar, eng yuqori bahosi bir barrel uchun 116 dollar, konsensus esa bir barrel uchun 93 dollarni tashkil etadi.
Metall narxi bu yil birinchi chorakdagi eng yuqori nuqtadan — 180 dan 140 punktga tushdi, yil oxiriga kelib indeks 130 punktga tushadi va kelgusi yilda u 10 punktdan kamroq o‘sadi, deb kutmoqda iqtisodchilar.
Qimmatbaho metallar narxi ham kelgusi yilda o‘rtacha o‘sishni davom ettirishi kutilmoqda.
G‘alla narxining keskin o‘sishi fonida oziq-ovqat mahsulotlari narxi ham ikkinchi chorakda eng yuqori cho‘qqiga chiqdi. Bundan tashqari, indeks 180 punktdan 150 gacha tushdi — bunga Ukrainadan g‘alla eksporti yordam berdi (shunga qaramay, bu yilgi hosil taxminan 40 foizga kamaydi).
Avvalroq O‘zbekistonda mandarin narxi bir hafta ichida 37 foizga arzonlashgani kuzatilgani haqida xabar berilgandi.
