DXX va bojxona boshqarmasi xodimlari hamkorligida o‘tkazgan tezkor-qidiruv tadbirlari natijasida Navoiy, Toshkent va Farg‘ona viloyatlarida kuchli ta’sir qiluvchi dori vositalari muomalaga kiritilishining oldi olindi. Bu haqda DXX matbuot xizmati xabar berdi.
DXXning Qoraqalpog‘iston bo‘yicha boshqarmasi xodimlari tomonidan O‘zbekiston bojxona boshqarmasi bilan hamkorlikda o‘tkazilgan tezkor-qidiruv tadbirlari natijasida, qozog‘istonlik narkokuryerlar tomonidan Navoiy viloyatining Uchquduq tumani Qizilqum cho‘li hududiga xufiyona tarzda ko‘mib ketilgan 12 ming dona “Tramadol” dori vositalari borligi aniqlanib, protsessual tartibda rasmiylashtirib olingan.
Mazkur dori vositalarining haqiqiy egasini aniqlash maqsadida tezkor tadbir davom ettirilib, To‘rtko‘l tumanida yashovchi, 1988-yilda tug‘ilgan, muqaddam sudlangan shaxs qo‘lga olingan.
Toshkentda o‘tkazilgan boshqa bir tezkor tadbirda Zangiota tumanida yashovchi, 1987-yilda tug‘ilgan tish shifokori Olmazor tumanida joylashgan o‘zining xususiy klinikasida 1960 dona “Regapen” kuchli ta’sir qiluvchi dori vositalarini noqonuniy saqlab kelayotgani aniqlangan.
DXXning Farg‘ona viloyati bo‘yicha boshqarmasi va viloyat bojxona boshqarmasi xodimlari tomonidan Farg‘ona—Qo‘qon yo‘nalishida harakatlanib ketayotgan Nexa Oltiariq tumani hududida to‘xtatilib, ko‘zdan kechirilganda, unda yo‘lovchi sifatida ketayotgan, muqaddam bir necha marta sudlangan 1989-yilda tug‘ilgan shaxsga tegishli 2803 dona “Regapen” va 1000 dona “Tropikamid” topilgan.
U kuchli ta’sir qiluvchi dori vositalarini Farg‘ona tumanida yashovchi, fuqarodan 50 million so‘mga sotib olgani aniqlanib, u ham qo‘lga olingan.
Farg‘ona tumanida yashovchi, 1998-yilda tug‘ilgan fuqaroning xonadoni ko‘zdan kechirilganda, unda 1050 dona “Regapen” va 101 dona “Tropikamid” kuchli ta’sir qiluvchi dori vositalari borligi aniqlangan.
Yuqorida keltirilgan barcha kuchli ta’sir qiluvchi dori vositalari O‘zbekistonga Qirg‘izistondan noqonuniy yo‘llar bilan olib kelingan.
Hozirda mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Izoh (0)