ДХХ ва божхона бошқармаси ходимлари ҳамкорлигида ўтказган тезкор-қидирув тадбирлари натижасида Навоий, Тошкент ва Фарғона вилоятларида кучли таъсир қилувчи дори воситалари муомалага киритилишининг олди олинди. Бу ҳақда ДХХ матбуот хизмати хабар берди.
ДХХнинг Қорақалпоғистон бўйича бошқармаси ходимлари томонидан Ўзбекистон божхона бошқармаси билан ҳамкорликда ўтказилган тезкор-қидирув тадбирлари натижасида, қозоғистонлик наркокурьерлар томонидан Навоий вилоятининг Учқудуқ тумани Қизилқум чўли ҳудудига хуфиёна тарзда кўмиб кетилган 12 минг дона «Трамадол» дори воситалари борлиги аниқланиб, процессуал тартибда расмийлаштириб олинган.
Мазкур дори воситаларининг ҳақиқий эгасини аниқлаш мақсадида тезкор тадбир давом эттирилиб, Тўрткўл туманида яшовчи, 1988 йилда туғилган, муқаддам судланган шахс қўлга олинган.
Тошкентда ўтказилган бошқа бир тезкор тадбирда Зангиота туманида яшовчи, 1987 йилда туғилган тиш шифокори Олмазор туманида жойлашган ўзининг хусусий клиникасида 1960 дона «Регапен» кучли таъсир қилувчи дори воситаларини ноқонуний сақлаб келаётгани аниқланган.
ДХХнинг Фарғона вилояти бўйича бошқармаси ва вилоят божхона бошқармаси ходимлари томонидан Фарғона—Қўқон йўналишида ҳаракатланиб кетаётган Неха Олтиариқ тумани ҳудудида тўхтатилиб, кўздан кечирилганда, унда йўловчи сифатида кетаётган, муқаддам бир неча марта судланган 1989 йилда туғилган шахсга тегишли 2803 дона «Регапен» ва 1000 дона «Тропикамид» топилган.
У кучли таъсир қилувчи дори воситаларини Фарғона туманида яшовчи, фуқародан 50 миллион сўмга сотиб олгани аниқланиб, у ҳам қўлга олинган.
Фарғона туманида яшовчи, 1998 йилда туғилган фуқаронинг хонадони кўздан кечирилганда, унда 1050 дона «Регапен» ва 101 дона «Тропикамид» кучли таъсир қилувчи дори воситалари борлиги аниқланган.
Юқорида келтирилган барча кучли таъсир қилувчи дори воситалари Ўзбекистонга Қирғизистондан ноқонуний йўллар билан олиб келинган.
Ҳозирда мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)