O‘zbekistonda so‘nggi bir hafta ichida mandarinning o‘rtacha ulgurji narxlari 37 foizga arzonlashdi. Bu haqda EastFruit xabar bermoqda.
Biroq shunday keskin pasayishga qaramay joriy ulgurji narxlar o‘tgan yilgi darajadan 31 foizligicha yuqoriligicha qolmoqda.
Tahlilchilarning fikriga ko‘ra, bunga asosiy sabab O‘zbekistonga mandarinning asosiy eksportyori — Pokistondan ushbu mahsulot yetkazib berilishining qisqarishi.
2022-yil 11-noyabrdan 18-noyabrga qadar O‘zbekistonda mandarinning o‘rtacha ulgurji narxi 1 kg uchun 27 mingdan 17 ming so‘mgacha pasaygan. Narxlarning keskin pasayishiga qaramay, joriy narxlar o‘tgan yilning shu sanasida qayd etilgan o‘rtacha ulgurji narxdan ancha yuqori.
Taqqoslash uchun aytadigan bo‘lsak, 2021-yilning 18-noyabr holatiga ko‘ra, ushbu mahsulotning o‘rtacha ulgurji narxi 1 kg uchun 13 ming so‘mni tashkil qilgan.
Mandarin narxining o‘tgan yilgi darajaga nisbatan qimmatligiga asosiy sabab Pokistondagi suv toshqinlari oqibatida hosilning bir qismi boy berilishi tufayli ushbu mamlakatdan mandarin yetkazib berish hajmining qisqarganidir.
Bu mamlakat O‘zbekistonga mandarinning asosiy yetkazib beruvchisi bo‘lib, 2020—2021-yillarda Pokistonning ushbu mahsulot importi umumiy hajmidagi ulushi 79-82 foizni tashkil etgan.
Musson yomg‘irlari suv toshqini bilan kechishi Janubiy Osiyo mamlakatlari uchun odatiy tabiiy hodisadir, biroq bu yil tabiat injiqligi halokatli darajaga yetib, Pokistonning barcha hududlarini qamrab oldi.
2022-yilning o‘ziga xos xususiyati Pokistonda iyun oyi o‘rtalaridan boshlab yog‘a boshlagan kuchli yog‘ingarchilik edi.
Mamlakat g‘arbi va janubidagi viloyatlar eng ko‘p zarar ko‘rdi, so‘nggi 30 yildagi o‘rtacha yog‘ingarchilikdan qariyb 400 foiz ko‘proq yog‘ingarchilik bo‘ldi.
Toshqinlar Pokiston iqtisodiyotiga katta zarar yetkazdi, mamlakat qishloq xo‘jaligi ham jiddiy ziyon ko‘rdi, mahalliy fermerlar ko‘plab turdagi ekinlar hosili boy berilishi oqibatida katta yo‘qotishlarga yuz tutdi.
Izoh (0)