“Biznes uchun nokaut”: Germaniyadagi kompaniyalar energiya inqirozi tufayli ishlab chiqarishni boshqa mamlakatlarga ko‘chirmoqchi

Germaniyaning eksportga yo‘naltirilgan iqtisodiga yuqori energiya narxlari qattiq ta’sir qildi. Bu haqda Die Welt’ga tayanib “Kommersant” yozmoqda. 

Germaniya sanoat ittifoqi bosh direktori Tanya Gunnerning aytishicha, har to‘rtta nemis kompaniyasidan biri ishlab chiqarishni xorijga ko‘chirish haqida o‘ylamoqda.

Energiya narxining yuqoriligi va iqtisodiyotning zaiflashuvi Germaniya iqtisodiyotiga zarar yetkazmoqda va dunyoning boshqa mamlakatlariga nisbatan bizning kompaniyalarimizga og‘ir yuk tushmoqda. Nemis biznes modeli juda katta stress ostida, — dedi Gunner xonim.

Germaniyaning Kimyo sanoati assotsiatsiyasi rahbari Volfgang Entrup ham inqirozning jiddiy oqibatlaridan shikoyat qildi. U soha davlat tomonidan qo‘llab-quvvatlanmasligidan xavotirda. 

Uning fikricha, agar kimyo sanoati zarar ko‘rsa, Germaniyadagi boshqa sanoat tarmoqlari ham qulaydi. 

Bu Germaniya biznesi uchun nokaut bo‘lishi mumkin, — deydi Voflgang Entrup. 

Oktyabr oyida Germaniyada inflyatsiya 11,6 foizni tashkil etdi va umuman mamlakat uchun narxlarning oshishi eng keskin muammo bo‘lib qolmoqda. 

Avvalroq Germaniya kansleri Olaf Shols Yevropa iqtisodiyotining qisqarishiga Osiyo davlatlarining rivojlanishi asosiy sabab bo‘lganini aytgandi. 

Uning so‘zlariga ko‘ra, Rossiya va Ukraina o‘rtasidagi harbiy mojaro va koronavirus pandemiyasi inqirozni faqat tezlashtirgan.