AQSH Xalqaro taraqqiyot agentligi (USAID) 25-noyabr kuni “O‘zbekistonda xotin-qizlarga nisbatan zo‘ravonlikka qarshi kurash: yutuqlar, tahdidlar va istiqbollar” nomli xalqaro konferensiya tashkil qildi. Bu haqda “Daryo” muxbiri xabar berdi.
Qayd etilishicha, konferensiya O‘zbekistondagi davlat organlari, fuqarolik jamiyati institutlari, xalqaro tashkilotlar vakillari va xalqaro ekspertlarni birlashtirib, xotin-qizlarga nisbatan zo‘ravonlikka qarshi kurashish va uning oldini olish maqsadida tashkillangan.
Shuningdek, konferensiyada xotin-qizlarga nisbatan zo‘ravonlikka barham berish va gender tengligini rag‘batlantirish borasidagi yutuqlar va davom etayotgan muammolarga alohida e’tibor qaratib o‘tildi. Anjumanda so‘zga chiqqan USAID’ning O‘zbekistondagi missiyasi direktori Mikaela Meredit shunday dedi: “Qo‘shma Shtatlar hukumati xotin-qizlarning iqtisodiy imkoniyatlarini kengaytirish, genderga asoslangan zo‘ravonlikka chek qo‘yish, mamlakatda va butun jahonda tengsizlikka qarshi kurash bo‘yicha keng qamrovli rejani amalga oshirmoqda. Gender zo‘ravonlikni qabul qilib bo‘lmaydi, u muqarrar emas va uni to‘xtatish mumkin”.
O‘zbekistonda gender tengligiga erishish va xotin-qizlarga nisbatan zo‘ravonlikka qarshi kurash borasida muhim qadamlar qo‘yildi, jumladan, 2019-yilda “Xotin-qizlarni tazyiq va zo‘ravonlikdan himoya qilish to‘g‘risida”gi qonun qabul qilindi. Ushbu qonun adolat tizimining xotin-qizlar va qizlar huquqlariga bo‘lgan munosabatni tubdan o‘zgartirdi va ushbu qonun bilan belgilangan yangi kafolatlarni hayotga tatbiq etish bo‘yicha aniq harakatlarni belgilab berdi.
USAID butun dunyo bo‘ylab inson huquqlari poymol qilinishi, ommaviy sog‘liqni saqlashga tahdidlar hamda xotin-qizlarning fuqarolik, siyosiy, ijtimoiy va iqtisodiy ishtirokini cheklanishi va rivojlanishiga to‘siq bo‘lgan zo‘ravonlikning oldini olishga sodiq ekani ta’kidlandi. Profilaktikaga katta e’tibor qaratgan holatda USAID oilalarda, shaxslararo munosabatlarda hamda turli jamoat va xususiy sharoitlarda xotin-qizlarga qarshi zo‘ravonlikning asosiy sabablarini hal qiluvchi dasturlarga sarmoya yo‘naltiradi. O‘zbekistonda USAID xotin-qizlarga nisbatan zo‘ravonlikning zararli oqibatlaridan xabardorlikni oshirish va uning oldini olish bo‘yicha samarali dasturlarni amalga oshirish uchun nodavlat tashkilotlar, xotin-qizlar guruhi, xususiy sektor va davlat muassasalari bilan hamkorlikni kengaytiradi.
Konferensiya 1991-yilda boshlangan Xotin-qizlarning global rahbarlik (liderlik) markazi tomonidan “Gender asosidagi zo‘ravonlikka qarshi 16 kunlik faollik” kampaniyasining muvofiqlashtirilgan fuqarolik jamiyati tashabbusi doirasida bo‘lib o‘tdi. Kampaniya har yili 25-noyabr – Xalqaro xotin-qizlarga nisbatan zo‘ravonlikka barham berish kunidan 10-dekabr – Inson huquqlari kunigacha davom etadi.
Izoh (0)