Dunyodagi eng yirik kriptovalyuta birjalaridan birining operatori Binance Holdings kriptovalyuta bozoridagi muammoli aktivlarni sotib olish uchun taxminan 1 milliard dollar ajratish niyatida. Bu haqda Bloomberg agentligiga kompaniya rahbari Changpen Chjao ma’lum qilgan.
Agar bu yetarli bo‘lmasa, biz ko‘proq mablag‘ ajratishimiz mumkin, — deya qo‘shimcha qildi Chjao.
Avvalroq Chjao FTX bankrotligidan so‘ng mohiyatan eng yirik kriptobirjaga aylangan Binance kriptovalyuta bozorini tiklashdan iborat bo‘lgan fond yaratishni rejalashtirayotganini ham ta’kidlagan edi.
Tadbirkorning fikriga ko‘ra, jamg‘armadan tushgan mablag‘lar likvidlik muammosiga duch kelgan loyihalarga yo‘naltiriladi.
Binance’ning asosiy maqsadi FTX tomonidan boshlangan bankrotlik to‘lqinining oldini olish bo‘ladi, — deb ta’kidladi Chjao.
Binance asoschisi va milliarder Chjao kriptovalyuta bozoridagi notinchlik davrida asosiy shaxsga aylandi.
Bu bozor joriy yilda qator muammolar, jumladan, amalga oshirilmagan loyihalar va global iqtisodiy tanazzul ortidan likvidlik yetishmasligi tufayli 1,4 trillion dollardan ko‘proq zarar ko‘rdi.
Ushbu qiyinchiliklar kriptovalyutalar bilan shug‘ullanadigan ko‘plab kompaniyalarning bankrotlik zanjiriga duch kelishiga olib keldi.
2022-yil boshida 32 milliard dollarga baholangan FTX kripto almashinuvi noyabr oyida bankrot bo‘lgan edi. Uning ortidan Genesis kriptobirjasi ham bankrot bo‘lishi mumkin.
Izoh (0)