Bagama orollarida ro‘yxatga olingan FTX kriptovalyuta birjasining operatori FTX Group biznesni qayta tashkil etish imkonini beruvchi 11-bob bo‘yicha bankrotlik to‘g‘risida ariza berdi. Bu haqda “Kommersant” xabar bermoqda.
Kompaniyaning Twitter sahifasida e’lon qilingan bayonotida FTX Group bosh direktori Sem Bankmen Frid iste’foga chiqqani ham e’lon qilingan. Uning o‘rnini bu lavozimda Jon Rey III egallaydi.
Avvalroq FTX kriptobirjasi atrofida likvidlik muammolari tufayli mojaro kelib chiqqandi. Buning ortidan bitkoin 15,6 ming dollargacha pasayib ketgan.
FTX kriptobirjasining o‘zi bir necha kun ichida 32 milliard dollarlik tuzilmadan bankrotlik yoqasiga kelib qoldi.
11-noyabr kuni Bagama orollari qimmatli qog‘ozlar komissiyasi FTX operatorining aktivlarini muzlatib qo‘ydi va buni aktivlarni saqlab qolish hamda birjani barqarorlashtirish zarurati bilan asosladi.
