Дунёдаги энг йирик криптовалюта биржаларидан бирининг оператори Binance Holdings криптовалюта бозоридаги муаммоли активларни сотиб олиш учун тахминан 1 миллиард доллар ажратиш ниятида. Бу ҳақда Bloomberg агентлигига компания раҳбари Чангпен Чжао маълум қилган.
Агар бу етарли бўлмаса, биз кўпроқ маблағ ажратишимиз мумкин, — дея қўшимча қилди Чжао.
Аввалроқ Чжао FTX банкротлигидан сўнг моҳиятан энг йирик криптобиржага айланган Binance криптовалюта бозорини тиклашдан иборат бўлган фонд яратишни режалаштираётганини ҳам таъкидлаган эди.
Тадбиркорнинг фикрига кўра, жамғармадан тушган маблағлар ликвидлик муаммосига дуч келган лойиҳаларга йўналтирилади.
Binance’нинг асосий мақсади FTX томонидан бошланган банкротлик тўлқинининг олдини олиш бўлади, — деб таъкидлади Чжао.
Binance асосчиси ва миллиардер Чжао криптовалюта бозоридаги нотинчлик даврида асосий шахсга айланди.
Бу бозор жорий йилда қатор муаммолар, жумладан, амалга оширилмаган лойиҳалар ва глобал иқтисодий таназзул ортидан ликвидлик етишмаслиги туфайли 1,4 триллион доллардан кўпроқ зарар кўрди.
Ушбу қийинчиликлар криптовалюталар билан шуғулланадиган кўплаб компанияларнинг банкротлик занжирига дуч келишига олиб келди.
2022 йил бошида 32 миллиард долларга баҳоланган FTX крипто алмашинуви ноябрь ойида банкрот бўлган эди. Унинг ортидан Genesis криптобиржаси ҳам банкрот бўлиши мумкин.
Изоҳ (0)