Samarqand viloyati Toyloq tumanida 22-noyabr kuni sodir bo‘lgan YTH oqibatida haydovchi vafot etdi. Bu haqda viloyat ichki ishlar boshqarmasi xabar berdi.
Ma’lum qilinishicha, Toyloq tumani “Bog‘izog‘on” mahallasi hududida o‘tuvchi Samarqand–Sadriddin Ayniy yo‘nalishida Urgut tumani “Tinchlik” mahallasida yashovchi 31 yoshli fuqaro M.Sh. Spark avtomashinasida harakatlanib ketayotgan bo‘lgan. Uning avtomobili qarama-qarshi yo‘lga chiqib ketishi oqibatida shu yo‘nalishda kelayotgan, Toyloq tumani “Talliota” mahallasida yashovchi 23 yoshli fuqaro R.X. boshqaruvidagi Damas bilan to‘qnashgan.
YTH sabab ikkala haydovchi tan jarohati bilan tuman markaziy shifoxonasida yotqizilgan. Ko‘rsatilgan muolajalarga qaramay, Spark haydovchisi shifoxonada vafot etgan.
Mazkur holat yuzasidan Toyloq tumani IIB huzuridagi tergov bo‘linmasi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Mavzuga doir: Toshkentda Nexia-3 urib yuborgan piyoda vafot etdi
Izoh (0)