Тошкентнинг Мирзо Улуғбек туманидаги IT парк биносида 23 ноябрь куни ёнғин юз бергани хабар қилинганди. Ахборот технологиялари ва коммуникацияларини ривожлантириш вазири Шерзод Шерматов ҳолат юзасидан муносабат билдирди.
Бугун IT парк комплексида қурувчиларимиз охирига етказаётган бинонинг тепасида озгина пеноплекс тутатиб юборишган экан, жуда кўп одамлар ва ОАВ шуни муҳокама қилишди. Лекин асосий Олов хабарларимиз ҳақида ҳали кўпчиликка етказиб беришга қийналяпмиз.Унинг сўзларига кўра, ҳатто чет элликлар аввалги «Ташкент — город хлебний» деган гапни, «Ташкент — город айтишний» деган мақолалар ёзиб, Ўзбекистоннинг IT хабга айланаётганини муҳокама қилмоқда.Бу йил жаҳонда иқтисодий ўсишдаги қийинчиликлар кузатилаётган вақтда айнан бизнинг IT парк резидентлари йил бошидан шу кунгача деярли 2 баробарга ортди. Энг асосийси, экспортёр корхоналар сони деярли 3 баробар ортди, хорижий корхоналар иштирокидаги резидентлар сони эса 6 баробарга ортди. Яъни йил бошида давлатимиз раҳбари томонидан Ўзбекистонни IT хабга айлантириш бўйича белгилаб берилган вазифаларининг амалий натижаларини бу йил якунланмасданоқ кўришга имкон бўляпти ва келгуси йиллар учун яхши пойдевор яратилмоқда.
Бу дегани, ёшларимиз, интернетдаги вақтларини кўпроқ чет тили ва ахборот технологияларини ўрганишга сарфлаганлари маъқулроқ, бекорга бировни ғийбат қилгандан кўра. Шунда улар ушбу экспортёр корхоналарда юқори маошли ишларга қабул қилинишлари мумкин бўлади, — дейди вазир.
Зора шу бугунги тутун ҳақидаги хабарлар орқали ёшларимиз ўзи нима экан бу IT парк, қандай қилсам, мен ҳам юқори даромадли иш топар эканман деб ўзларига савол бериб, соҳамизга қизиқсалар ва ўз устиларида ишлашни бошласалар ҳамда кўпроқ халқаро тан олинадиган IT сертификатларни олсалар, — дея фикрига якун ясаган Шерматов.
Маълумот учун, 23 ноябрь куни соат 11:12 да Шаҳриобод кўчасида жойлашган кўп қаватли биноларнинг бирида ёнғин содир бўлаётгани тўғрисида шаҳар ФВБга хабар келиб тушган. Шунга кўра 3 та ёнғин-қутқарув экипажи соат 11:15 да воқеа жойига етиб борган ва ёнғин соат 11:25 да ўчирилган.
Ёнғин оқибатида 24 қаватли қурилиши тугалланмаган IT парк биносининг 21-қаватида тахминан 5 квадрат метр майдонда пенопласт қолдиқлари ёниб зарарланган.
Изоҳ (0)