Hech bir inson osonlikcha muvaffaqiyatga erishmaydi. San’at vakillari orasida ham karyerasini qiyinchilik bilan boshlagan, muhtojlikdan yollanma ishchi bo‘lishga ham majbur bo‘lganlar bisyor. Ular o‘tgan kunidan uyalmaydi, aksincha bugungi natijalarda u kunlarda hissasi katta deb hisoblashadi.
Rahmonali Suropov: “Ohakdan oyog‘im kuygan”
“Qalpoq” hajviy ko‘rsatuvi bilan tomoshabinlarga yaxshi tanish bo‘lgan aktyor Rahmonali Suropov bir necha yil yollanma ishchi bo‘lib ishlashga majbur bo‘lgani haqida so‘zlab berdi.
— Mardikor bo‘lganimdan hech qachon uyalmayman. Moliyaviy qiyinchiliklar sabab, erkak kishi bilishi kerak bo‘lgan juda ko‘p hunarlarni yollanma ishchi bo‘lganimdan o‘rganganman. Onam kasalxonada farrosh bo‘lib ishlab, ikki farzandni yolg‘iz ulg‘aytirgan. Bolalikdan bahor faslini yomon ko‘rardim. Chunki uyimizning tomidan ko‘p chakki o‘tardi. Sahargacha to‘lgan idishlarni bo‘shatish bilan tong orttirardik. Xullas, uch yil deganda san’at oliygohiga o‘qishga qabul qilinganman. Ammo poytaxtda yashab, o‘qish oson emasdi. Shu bois, boshqa talabalar qatori yollanma ishlarga chiqqanman. U paytlari “Chor-su” bozorining yonida yollanma ishchilar qatorlashib turishardi. Ammo ularning ko‘pchiligi og‘ir ishlarni qilishni istashmasdi. Bolalikdan og‘ir mehnat qilib o‘rganganim uchun ish tanlamasdim. Bir kuni “Pastdan ohak olib berasiz”, deyishdi. Oyog‘imga uzun etiklarni kiydirib pastda tushirishdi. U yerda ohak qaynab turardi. Uni chelaklab olib berishim kerakligini aytishdi. Suyuq ohakning bir tomchisi ham teriga tushsa, reaksiyaga kirishib, tanaga jarohat yetkazar ekan. Ish paytida oyog‘imga ohak tekkanini bilmay qolibman, oyog‘imning suyagigacha jarohat yetkazibdi. Eng qizig‘i, teri kuygan ammo bir tomchi ham qon chiqmagan. Institutni tamomlagunga qadar darsdan keyin mardikorlik qilishimga to‘g‘ri kelgan, — deydi komik aktyor Rahmonali Suropov.
Mehriddin Rahmatov: “Ishlagan haqimni ololmagan paytlar ham bo‘lgan”
O‘zbekistonda xizmat ko‘rsatgan artist Mehriddin Rahmatov talabalik yillarida kursdoshlari bilan yollanma ishchi bo‘lishga majbur bo‘lgani va pul topish ilinjida novvoychilikni ham o‘rganganini gapirib berdi.
— Viloyatlik insonlarning Toshkentda o‘qishi oson emas. Ota-onamga yuk bo‘lishni istamaganim uchun ishlashga qaror qilganman. Menga 2-3 ta kursdoshlarim ham sherik bo‘lishgan. Aslida talabalarning mardikorchilikka chiqishi yangilik emas. Yer chopish, axlat tashish, o‘ra to‘ldirish, gilos terish kabi ishlarga chaqirishardi. Ishga chiqqan kunimiz qornimiz ham to‘yardi, bir-ikki so‘m pul ham ishlardik. Ammo kelishilgan haqimizni bermagan yoki yarmini berib, xayr-ho‘sh qilganlar juda ko‘p. Mana shunday voqealardan keyin novvoychilikni o‘rganganman. San’at institutini tamomlagandan keyin ham bir necha oy novvoychilik bilan shug‘ullanganman, — deydi aktyor Mehriddin Rahmatov.
Gulnora Tolipova: “Meni uy tozalashga chaqirishardi”
“Jurnalist” va “Shukrona” seriali bilan tomoshabinlarga yaxshi tanish bo‘lgan aktrisa Gulnora Tolipova ham bir paytlar uy-joy olish uchun yollanma xizmatchi bo‘lgani haqida so‘zlab berdi.
— Sobiq turmush o‘rtog‘imning xiyonati va zo‘ravonliklariga chidolmay, ota uyimga qaytib keldim. Ota hovlim ham kamtarona edi. Hech qayerda o‘qitmay maktabni tamomlashim bilan turmushga berishgani uchun ish topishga qiynalganman. O‘g‘lim Shohruh Mirzo hali juda kichkina edi. Shunda tanishlarimdan biri yollanma ishchi bo‘lishni va xonadonlarni tozalashga borishni maslahat bergan. Faqat bir ish bilan cheklanib qolmasdim. Bozorda pista-qurt, ovqat sotardim, uy-tozalashga chaqirishga u yerga ham borib kelardim. Xullas, uy-joy qilaman, mashina olaman deb o‘zimni ayamaganman. 50 ming so‘m pul evaziga xonanda Lola Yo‘ldoshevaning uyini tozalash uchun borgan kunlarim ham esimda, — deydi aktrisa Gulnora Tolipova.
Jaloliddin Ahmadaliyev: “Santexniklik bo‘yicha malakam bor”
“Yor bizdan ketdi” va “Menda qolmadi dil” qo‘shiqlari bilan omma e’tiboriga tushgan va yashin tezligida tanilayotgan ijodkor Jaloliddin Ahmadaliyev ham bir paytlar yollanma ishchi bo‘lib ishlagan.
— Maktabni tamomlab, akalarim bilan Rossiyaga ishlashga ketganman. O‘shanda 18 yoshda edim. U yerda qurilish, mashina yuvish shoxobchasida ishladim. Undan keyin O‘zbekistonga qaytib, yana shu ish bilan shug‘ullandim. Keyin dadamning talabi sabab kosibga shogirdlikka tushdim. Ikki yil kosibchilik qildim. Ammo zaharli yelim sabab oshqozonim qattiq og‘riydigan bo‘lib qoldi. Bir muddat Toshkentga borib, santexnik ham bo‘lib ishlaganman. Bu bo‘yicha yaxshigina malakam bor, — deydi Jaloliddin Ahmadaliyev.
Osmon Navro‘zov: “Rossiyada yollanma ishchi bo‘lganman”
O‘zbekistondagi internet yulduzi Osmon Navro‘zov ham faoliyatini yollanma ishchilikdan boshlagan. U oilasidagi yetishmovchilik sabab, maktabni tamomlashi bilan muhojirlik safariga otlangan.
— Dadam haqiqiy quruvchi 10 yil Rossiyada ishlagan. Maktabni bitirganimdan keyin dadam shifokorlik bo‘yicha o‘qishimni istagandi. San’atga bo‘lgan qiziqishim yuqoriligi sabab, pul ishlash uchun “Rossiyaga ketaman”, deb turib olganman. Ammo bu ishda hech qanday tajribam yo‘q edi. Shu bois, bir muddat yollanma ishchi bo‘lib ishlaganman. Ustalar beton quyishni yoki suvoqchilikni o‘rgatmoqchi bo‘lishgan, ammo hayolim san’atga bo‘lgani uchun uddasidan chiqolmaganman. Bir muddat ishlaganimdan so‘ng, Qoraqalpog‘istonga qaytib kelganman. Ammo qurilish sohasidan ozmi-ko‘pmi xabarim bor. Shu bois, karantin vaqtida do‘stim bilan Sardobadagi yangi uylarning qurilishida ishlaganmiz, — deydi xonanda Osman Navro‘zov.
Shahboz Sattorov: “Mardikor bozoridan syomka maydonchasiga qatnardim”
Ijtimoiy tarmoqlardagi chiqishlari bilan xalqimizga yaxshi tanish bo‘lgan vayner Shahboz Sattorov poytaxtda kelganida, faoliyatini yollanma ishchilikdan boshlagan.
— 2019-yilning aprel oyida Toshkentga kelganman. Aslida Toshkentda biror tanishim yoki tayinli ishim yo‘q edi. Ammo uydagilarni “Ishga chaqirishayapti” deb aldab kelgandim. Xullas, vokzaldan tushgandan keyin duch kelgan avtobusga o‘tirib, shahar aylangandim. Keyin Zangiotaga borib qolib, mashina yuvish shoxobchasiga kirganman. Sinov asosida ishga olinib, 15 kun mashina yuvganman. Kuniga 25-30 ming so‘m pul topardim, ammo kun bo‘yi zaxda ishlaganim uchun kechasi bilan oyog‘im og‘rib chiqardi. Undan keyin ikki yarim oy “Parkent” bozorida yollanma ishchi bo‘lib ishlaganman. Odamlar rosa ustamon ekanini o‘shanda bilganman. “Ikki arava qurilish axlati bor, shuni tashqariga olib chiqish kerak”, deb uylariga olib borishardi-da, kechgacha bir Kamaz axlatni tashitishardi. O‘sha paytlarda “Zo‘r TV” kanalidagi “Stend up” ko‘rsatuvida ishtirok etardim. Hazillarimning deyarli yarmi mardikor bozorida yozilardi, — deydi komik Shahboz Sattorov.
Mavzuga doir:
Izoh (0)