Ҳеч бир инсон осонликча муваффақиятга эришмайди. Санъат вакиллари орасида ҳам карьерасини қийинчилик билан бошлаган, муҳтожликдан ёлланма ишчи бўлишга ҳам мажбур бўлганлар бисёр. Улар ўтган кунидан уялмайди, аксинча бугунги натижаларда у кунларда ҳиссаси катта деб ҳисоблашади.
Раҳмонали Суропов: «Оҳакдан оёғим куйган»
«Қалпоқ» ҳажвий кўрсатуви билан томошабинларга яхши таниш бўлган актёр Раҳмонали Суропов бир неча йил ёлланма ишчи бўлиб ишлашга мажбур бўлгани ҳақида сўзлаб берди.
— Мардикор бўлганимдан ҳеч қачон уялмайман. Молиявий қийинчиликлар сабаб, эркак киши билиши керак бўлган жуда кўп ҳунарларни ёлланма ишчи бўлганимдан ўрганганман. Онам касалхонада фаррош бўлиб ишлаб, икки фарзандни ёлғиз улғайтирган. Болаликдан баҳор фаслини ёмон кўрардим. Чунки уйимизнинг томидан кўп чакки ўтарди. Саҳаргача тўлган идишларни бўшатиш билан тонг орттирардик. Хуллас, уч йил деганда санъат олийгоҳига ўқишга қабул қилинганман. Аммо пойтахтда яшаб, ўқиш осон эмасди. Шу боис, бошқа талабалар қатори ёлланма ишларга чиққанман. У пайтлари «Чор-су» бозорининг ёнида ёлланма ишчилар қаторлашиб туришарди. Аммо уларнинг кўпчилиги оғир ишларни қилишни исташмасди. Болаликдан оғир меҳнат қилиб ўрганганим учун иш танламасдим. Бир куни «Пастдан оҳак олиб берасиз», дейишди. Оёғимга узун этикларни кийдириб пастда туширишди. У ерда оҳак қайнаб турарди. Уни челаклаб олиб беришим кераклигини айтишди. Суюқ оҳакнинг бир томчиси ҳам терига тушса, реакцияга киришиб, танага жароҳат етказар экан. Иш пайтида оёғимга оҳак текканини билмай қолибман, оёғимнинг суягигача жароҳат етказибди. Энг қизиғи, тери куйган аммо бир томчи ҳам қон чиқмаган. Институтни тамомлагунга қадар дарсдан кейин мардикорлик қилишимга тўғри келган, — дейди комик актёр Раҳмонали Суропов.
Меҳриддин Раҳматов: «Ишлаган ҳақимни ололмаган пайтлар ҳам бўлган»
Ўзбекистонда хизмат кўрсатган артист Меҳриддин Раҳматов талабалик йилларида курсдошлари билан ёлланма ишчи бўлишга мажбур бўлгани ва пул топиш илинжида новвойчиликни ҳам ўрганганини гапириб берди.
— Вилоятлик инсонларнинг Тошкентда ўқиши осон эмас. Ота-онамга юк бўлишни истамаганим учун ишлашга қарор қилганман. Менга 2-3 та курсдошларим ҳам шерик бўлишган. Аслида талабаларнинг мардикорчиликка чиқиши янгилик эмас. Ер чопиш, ахлат ташиш, ўра тўлдириш, гилос териш каби ишларга чақиришарди. Ишга чиққан кунимиз қорнимиз ҳам тўярди, бир-икки сўм пул ҳам ишлардик. Аммо келишилган ҳақимизни бермаган ёки ярмини бериб, хайр-ҳўш қилганлар жуда кўп. Мана шундай воқеалардан кейин новвойчиликни ўрганганман. Санъат институтини тамомлагандан кейин ҳам бир неча ой новвойчилик билан шуғулланганман, — дейди актёр Меҳриддин Раҳматов.
Гулнора Толипова: «Мени уй тозалашга чақиришарди»
«Журналист» ва «Шукрона» сериали билан томошабинларга яхши таниш бўлган актриса Гулнора Толипова ҳам бир пайтлар уй-жой олиш учун ёлланма хизматчи бўлгани ҳақида сўзлаб берди.
— Собиқ турмуш ўртоғимнинг хиёнати ва зўравонликларига чидолмай, ота уйимга қайтиб келдим. Ота ҳовлим ҳам камтарона эди. Ҳеч қаерда ўқитмай мактабни тамомлашим билан турмушга беришгани учун иш топишга қийналганман. Ўғлим Шоҳруҳ Мирзо ҳали жуда кичкина эди. Шунда танишларимдан бири ёлланма ишчи бўлишни ва хонадонларни тозалашга боришни маслаҳат берган. Фақат бир иш билан чекланиб қолмасдим. Бозорда писта-қурт, овқат сотардим, уй-тозалашга чақиришга у ерга ҳам бориб келардим. Хуллас, уй-жой қиламан, машина оламан деб ўзимни аямаганман. 50 минг сўм пул эвазига хонанда Лола Йўлдошеванинг уйини тозалаш учун борган кунларим ҳам эсимда, — дейди актриса Гулнора Толипова.
Жалолиддин Аҳмадалиев: «Сантехниклик бўйича малакам бор»
«Ёр биздан кетди» ва «Менда қолмади дил» қўшиқлари билан омма эътиборига тушган ва яшин тезлигида танилаётган ижодкор Жалолиддин Аҳмадалиев ҳам бир пайтлар ёлланма ишчи бўлиб ишлаган.
— Мактабни тамомлаб, акаларим билан Россияга ишлашга кетганман. Ўшанда 18 ёшда эдим. У ерда қурилиш, машина ювиш шохобчасида ишладим. Ундан кейин Ўзбекистонга қайтиб, яна шу иш билан шуғулландим. Кейин дадамнинг талаби сабаб косибга шогирдликка тушдим. Икки йил косибчилик қилдим. Аммо заҳарли елим сабаб ошқозоним қаттиқ оғрийдиган бўлиб қолди. Бир муддат Тошкентга бориб, сантехник ҳам бўлиб ишлаганман. Бу бўйича яхшигина малакам бор, — дейди Жалолиддин Аҳмадалиев.
Осмон Наврўзов: «Россияда ёлланма ишчи бўлганман»
Ўзбекистондаги интернет юлдузи Осмон Наврўзов ҳам фаолиятини ёлланма ишчиликдан бошлаган. У оиласидаги етишмовчилик сабаб, мактабни тамомлаши билан муҳожирлик сафарига отланган.
— Дадам ҳақиқий қурувчи 10 йил Россияда ишлаган. Мактабни битирганимдан кейин дадам шифокорлик бўйича ўқишимни истаганди. Санъатга бўлган қизиқишим юқорилиги сабаб, пул ишлаш учун «Россияга кетаман», деб туриб олганман. Аммо бу ишда ҳеч қандай тажрибам йўқ эди. Шу боис, бир муддат ёлланма ишчи бўлиб ишлаганман. Усталар бетон қуйишни ёки сувоқчиликни ўргатмоқчи бўлишган, аммо ҳаёлим санъатга бўлгани учун уддасидан чиқолмаганман. Бир муддат ишлаганимдан сўнг, Қорақалпоғистонга қайтиб келганман. Аммо қурилиш соҳасидан озми-кўпми хабарим бор. Шу боис, карантин вақтида дўстим билан Сардобадаги янги уйларнинг қурилишида ишлаганмиз, — дейди хонанда Осман Наврўзов.
Шаҳбоз Сатторов: «Мардикор бозоридан съёмка майдончасига қатнардим»
Ижтимоий тармоқлардаги чиқишлари билан халқимизга яхши таниш бўлган вайнер Шаҳбоз Сатторов пойтахтда келганида, фаолиятини ёлланма ишчиликдан бошлаган.
— 2019 йилнинг апрель ойида Тошкентга келганман. Аслида Тошкентда бирор танишим ёки тайинли ишим йўқ эди. Аммо уйдагиларни «Ишга чақиришаяпти» деб алдаб келгандим. Хуллас, вокзалдан тушгандан кейин дуч келган автобусга ўтириб, шаҳар айлангандим. Кейин Зангиотага бориб қолиб, машина ювиш шохобчасига кирганман. Синов асосида ишга олиниб, 15 кун машина ювганман. Кунига 25-30 минг сўм пул топардим, аммо кун бўйи захда ишлаганим учун кечаси билан оёғим оғриб чиқарди. Ундан кейин икки ярим ой «Паркент» бозорида ёлланма ишчи бўлиб ишлаганман. Одамлар роса устамон эканини ўшанда билганман. «Икки арава қурилиш ахлати бор, шуни ташқарига олиб чиқиш керак», деб уйларига олиб боришарди-да, кечгача бир Камаз ахлатни ташитишарди. Ўша пайтларда «Zo‘r TV» каналидаги «Stend up» кўрсатувида иштирок этардим. Ҳазилларимнинг деярли ярми мардикор бозорида ёзиларди, — дейди комик Шаҳбоз Сатторов.
Мавзуга доир:
Изоҳ (0)