Farg‘onada fuqarolarga o‘zini konsalting xizmati ko‘rsatuvchi muassasa xodimi deb tanishtirib, ularning pullarini olgach, o‘z ehtiyojlariga sarflab yuborgan shaxs ushlandi.
Ma’lum bo‘lishicha, Farg‘ona politexnika instituti bitiruvchi kurs talabasi J.A. Farg‘ona shahridagi konsalting xizmati ko‘rsatuvchi muassasada bir necha oy menejer bo‘lib ishlagan. Muassasaning asosiy faoliyat yo‘nalishi yoshlarni chet elga o‘qishga yuborish bo‘lib, oz muddat orasida ish jarayoni, talabalarni qay yo‘sinda xorijga yuborish, ularning o‘qishini ko‘chirish tartiblarini bilib olgan J.A. ishdan bo‘shasa-da, bir necha fuqaroga go‘yo “rasmiy tarzda huquqiy yordam berishini” aytib, ularning ishonchini qozongan.
Jumladan, xorijda tahsil olayotgan Sh.Mamatyoqubov, Sh.Nomonjonov, U.Arapov, M.Qodirova, F.Tojiboyevlarga o‘zini konsalting xizmati ko‘rsatish muassasasi xodimi sifatida tanishtirgan. So‘ng ularning o‘qishini O‘zbekistonga, xususan, Farg‘ona vodiysidagi istalgan oliygohga ko‘chirib berishini aytgan. Bu bo‘yicha bir nechta hujjatlarni tayyorlagan. O‘zganing mulkini aldash va ishonchni suiiste’mol qilish yo‘li bilan qo‘lga kiritish maqsadida ularning 400—500 dollardan pul mablag‘larini qo‘lga kiritgan. So‘ng pullarni o‘z shaxsiy manfaatlari yo‘lida sarflab yuborgan.
2022-yil 18-yanvar kuni Iqtisodiy jinoyatlarga qarshi kurashish departamenti Farg‘ona viloyati boshqarmasi xodimlari tomonidan o‘tkazilgan tezkor tadbir davomida J.A. Farg‘ona shahri Oybek ko‘chasida joylashgan tug‘uruqxona oldida F.Tojiboyevdan kimyoviy ishlov berilgan 500 dollarni olgan vaqtda ushlangan va ushbu pullar ashyoviy dalil tariqasida olingan.
Sud barcha tafsilotlarni o‘rganib chiqib, J.A.ga nisbatan tegishli jazo tayinladi.
Izoh (0)